Zhorjelc (SN/BŠe). Dwělomne zawrěće zawoda Siemens w Zhorjelcu je doskónčnje z blida. W nocy na wutoru dojednachu so nawodnistwo předewzaća, cyłkowna zawodna rada a dźěłarnistwo IG metal na wotpowědne zrěčenje, stejnišćo zachować. Dojednanje twori nětko zakład za přichodne jednanja, kotrež měli so bórze zahajić a hač do 30. septembra zakónčene być.
Sprjejcy (JoS/SN). Druhi twarski wotrězk Sprjewineje dróhi dale a bóle zrawi. Tuchwilu přewjeduja proceduru zawěsćenja twarskeho plana. Wotpowědne podłožki su na tamnišim gmejnskim zarjedźe zjawnje přistupne. Wobstatk dróhotwarskich dźěłow je 600 metrow dołhi móst, kotryž ma doł Sprjewje přeprěčić. Přećiwo twarej dróhi a mosta je Sprjejčanska wobswětowa skupina minjenu njedźelu protestowała. A to na městnje, hdźež ma móst nastać. Po słowach akterki Ursule Eichendorff dźe wo to, kolesowarjam wuwědomić, zo njeje móst trěbny. „Sprjewiny doł sewjernje Sprjejc je krajinowy juwel gmejny, rěčna łučina je jedna z najrjeńšich podłu nadregionalneje kolesowanskeje šćežki a zdobom wobstatk. europskeje přirodoškitneje kónčiny. Tu kruće škitane wudry a njetopyrje su nětko wosebje wohrožene. Wulki móst by tónle paradiz zničił.“ Po nahledźe wobswětoškitarjow njeje Sprjewina dróha hižo trěbna. Přičina toho su aktualne wobchadne prognozy. Dale eksistuje nowy wukonliwy železniski zwisk mjez industrijnymaj stejnišćomaj Čornej Pumpu a Hamorom.
Worklecy (SN/BŠe). We wosebitym busu z pjekarjomaj plećenu całtu pjec móžachu wčera dźěći Worklečanskeje zakładneje šule. „Chcemy w nich zajim za naše rjemjesło budźić“, wuswětli pjekar ze wsy Michael Šlapa. Mnohe dźěći znaja jenož wulke kupnicy. Pjekar jako tajki, kiž całty a chlěb pječe, dźensniši dźeń za młódšu generaciju žanu wulku rólu wjac njehraje. Ćim wažnišo je na so skedźbnjeć, štož je móžno z projektom Bäckman centralneho zwjazka němskeho pjekarskeho rjemjesła. Budyske wokrjesne rjemjeslnistwo smě jónu wob lěto staciju busa wuzwolić. Tónkróć bě to Worklečanska šula. Wězo bě Michael Šlapa hnydom zwólniwy projekt podpěrać. Pjatnaće kilogramow twarohoweho ćěsta měješe wón spřihotowane a je wčera zhromadnje z Wjelećanskim kolegu Markusom Thonigom šulerjam w busu pjekarske rjemjesło spřistupnił.
Po tym zo njepřewjeduja hižo Budyske předewzaćelske dny a Kamjenske wiki WIR, je Konventa w Lubiju jenička přemysłowa přehladka na wuchodźe Sakskeje. Tohodla wužiwachu tež mnohe předewzaća składnosć, so w Lubiju prezentować. A tójšto wopytowarjow bě minjeny kónc tydźenja na ležownosć bywšeje krajneje zahrodniskeje wustajeńcy přišło. Na parkowanišćach móžachu nawal hosći lědma zmištrować. Wulki dźěl wustajerjow a institucijow pochadźeše z regiona Lubij, Žitawa a Zhorjelca. Budyska a Kamjenska kónčina běštej bohužel jenož snadnje zastupjenej. Budyske město njebě scyła prezentne. Porno tomu wužištej měsće Kamjenc a Wjelećin přiležnosć, na so skedźbnjeć.
Hamor (AK/SN). W serbskej drasće su hosći při Bjerwałdskim jězoru přijeli. Marietta Mattitza, Linda Mächling, Tini Domel a Nico Domel z Wochozy witachu z chlěbom a selu wopytowarjow na wosebity wikowanski dźeń regionalneho wudźěłka. „Rady zarjadowanje podpěramy, wšako je to dobra přiležnosć, drastu pokazać a na serbske korjenje dopominać“, měni sobotu Hannelore Bartko, kotraž přisłuša předsydstwu Wochožanskeje Domowinskeje skupiny. „Smy jenička wjes Hamorskeje gmejny z Domowinskej skupinu. Runje tak jenička wjes, hdźež je serbska drasta hišće wobchowana a hdźež so ju woblěkamy.“
Nalěćo je čas wikow. Přichodnu njedźelu změjemy hnydom dwě jubilejnej zarjadowani. Tak přeprošuje Krabatowy mlokowy swět w Koćinje na burske wiki. Na Erlichtec dworje w Rěčicach pak změja zahrodowe wiki.
Koćina/Rěčicy (SN/BŠe). Regionalne wudźěłki su mjez kupcami jara prašane. Tomu je tež kóžde lěto na burskich wikach w Koćinje tak. Wjac hač 70 direktnych wikowarjow a rjemjeslnikow ze Sakskeje chce tam přichodnu njedźelu swoje wudźěłki prezentować. Star budźe bjezdwěla jubilejny twarožk, wšako zhladuja w Koćinje na mjeztym 10. burske wiki. Wulka a wosebita twarožkowa pokruta je z prěnich produkciskich dnjow pokazkoweje twarožkarnje Krabatoweho mlokoweho swěta. W Koćinje předźěłuja čerstwe mloko dejkow, kotrež na dworje plahuja, hnydom na twarožk abo dalše mlokowe wudźěłki. Jednotliwe wotběhi móža sej ludźo tam kóždy čas wobhladać. Mjeztym wopřijima sortiment twarožkoweje manufaktury něhdźe dwaceći družinow. Mjez nimi su speciality kaž „sušeny čorny młynk“. Tohorunja móža wopytowarjo wikow kreacije twarožka z domizniskich zelow woptawać.
Łužiska hospodarska iniciatiwa (WiL) je wčera wědomostne transferne myto spožčiła. Z mytom WiL wusahowace kooperacije mjez wědmosću a hospodarstwom hódnoća.
Carny Gózd (SN/BŠe). „Dźakuju so wšitkim wobdźělnikam, kotřiž su swoje projekty Łužiskej hospodarskej iniciatiwje zapodali. Kóždy jednotliwy projekt je dobry přikład za kooperaciju mjez wědomosću a hospodarstwom we Łužicy. Wuběrneje kwality dla njebě rozsud jury jednory“, wuswětli jednaćel WiL Michael Schulz w Carnym Gózdźe (Schwarzheide), hdźež su wčera sedmy raz wědomostne transferne myto spožčili. Wšelakore wobsahi projektow pokazuja na wosebitu kwalitu kooperacijow.
Dobyćerjo su poprawom wšitcy, wšako předewzaća ze zhromadnym dźěłom z wědomostnymi institucijemi swoju kmanosć wubědźowanja skruća. Praktiske nazhonjenja w zawodach pak wobohaćeja wučbu uniwersitow a napjelnjeja wědomosć ze žiwjenjom.
„Łužica ma stawizny, kulturu a tradicije, kotrež měli ludźi zeznać“, zwurazni Sladana Stamenkovski. Minjeny tydźeń je sej Słowjenka wosebitosće łužiskeho Krabatoweho regiona bliže wobhladała, štož ma wězo swoju přičinu. Přichodnje budźe wona hłowna zamołwita za jězby po slědach Krabata alias Jana Šadowica nowozałoženeho pućowanskeho běrowa z mjenom Šadovic w Słowjenskej. Wot Chorwatskeje, přez Słowjensku, dale do Drježdźan a Łužicy móža zajimcy jeho žiwjenske stacije a region zeznać. „Tež wupućowarjow z Ameriki chcemy za jězby zdobyć. Na wosebite wašnje móža so ze swojim pochadom zaběrać“, Sladana Stamenkovski powěda. Wězo su tež jězby w napřećiwnym směrje móžne. Logistisce stej lětanišći w Berlinje a Zagrebje cilej za zahajenje jězbow. Krok po krok chce wona poskitki zdźěłać. Wiziju, zo docpěja pućowanja po slědach Krabata runinu wuznamnych europskich jězbow kaž na přikład do Barcelony wona z wočow njezhubi. Aktiwnje chce turistikarka přichodnje w socialnych syćach za poskitki wabić.