Počesćenje tež do Wojerec

pjatk, 12. januara 2018 spisane wot:

Drježdźany (SN/at). Wo rozpalitosći a zahoritosći w rjemjesle swědčeše wčerawše počesćenje najlěpšich Drježdźanskeje rjemjeslniskeje komory (HWK) w krajnej stolicy. Na wšelakich runinach spěchuja wuznamjenjeni z načolnymi wukonami zdobyće powołanskeho dorosta we wuchodosakskim rjemjesle, kaž HWK in­for­muje. 24 z nich docpě prědnje městna we „Wukonowym wurisanju němskeho rjemjesła – profije něšto zdokonjeja“ w Drježdźanskim komornym wobwodźe. Dwaj staj samo podestne městno na zwjazkowej runinje wobsadźiłoj. Štwór­ćina počesćenych pochadźa z Budyskeho a Zhorjelskeho wokrjesa.

18 kwalifikowaše so za stipendij „Spěchowanje wobdarjenych w powołanskim kubłanju“ zwjazkoweho knježerstwa. Tu je­ třećina wuspěšnych młodych ludźi z Budyskeho a Zhorjelskeho wokrjesa.

30 firmow počesćichu jako „Přikładny wukubłanski zawod 2017“. Nimale po­łojca, 14, ma swoje sydło w Budyskim a Zhorjelskim wokrjesu. Mjez tule wu­znamjenjenymi je frizerski mišter Heiko Schneider z Wojerowskeho salona „HaarSchneider“.

Zbrašenym wjace šansow na dźěło

štwórtk, 11. januara 2018 spisane wot:

Předewzaća w Hornjej Łužicy trjebaja fachowe mocy. Zo móža to tež ludźo z handicapom być, njebě minjene lěta samozrozumliwe. W Budyskej agenturje za dźěło pak wobkedźbuja po zdaću změnu trenda. Wšako chce najwjac ćežko­zbrašenych dźěłać, hustodosć su tež kwalifikowani.

Budyšin (CK/SN). W Hornjej Łužicy je spočatk noweho lěta 1 297 bjezdźěłnych ludźi z handicapom, 41 mjenje hač loni w samsnym času. „Dlěši čas njeje tale skupina wosobow žadyn podźěl na pozitiwnym wuwiću hornjołužiskich dźěłowych wikow měła“, rozłožuje Thomas Berndt, šef agentury za dźěło w Budyšinje. Přeco hišće su předsudki a wobmyslenja nastupajo ludźi ze zbrašenjom.

Hladajo na přiběracu potrjebu fachowych mocow pak zwěsća Thomas Berndt nětko po zdaću změnu trenda. Dźeń a bóle spóznawaja dźěłopřijimarjo potencial tejele skupiny wosobow. To pytnješ na rozmołwach. Loni bě 305 bjezdźěłnych ćežkozbrašenych mjenje registrowanych hač 2015. Nimo toho wupokazuje statistika za minjene lěto 2 185 naprawow, zo bychu so zbrašeni na dźěłowych wikach wobdźělili.

Rózbork (SN). Wulka bě loni zahoritosć, zo chce chinski inwestor na arealu lětanišća w Rózborku zawod za elektrowozydła twarić. Nětko zdźěli Zhorjelski krajnoradny zarjad, zo njejsu měsacy trajace jednanja wuspěšne byli. Chinski awtomobilowy dodawar Beijing WKW Automotive wzda so zasydlenja a miliardoweje inwesticije. Kaž ze zdźělenki krajnoradneho zarjada wuchadźa, předewzaće předwidźanu ležownosć njekupi, dokelž je jemu 250 hektarow přemało.

Dokelž mějachu na přestrjeni lětanišća instalowane woltaikowe připrawy wostać, bě wokrjes poskićił płoniny za dalši wutwar a za potencielne doda­wanske zawody powjetšić. Loni 13. decembra su chinskemu inwestorej móžne rozšěrjenje dalši raz w Drježdźanach rozłožili. Ke konkretnemu připrajenju nastupajo kupny wotpohlad inwestora pak njeje bohužel wjace dóšło, wokrjesne zarjadnistwo wobžaruje.

Nastajenje chwalobne

srjeda, 10. januara 2018 spisane wot:
Sprawnje prajene, sym sej pod zapřijećom „domjace a zahrodowe čaporowe wiki“, kotrež Krollecy sobotu we Wudworju wotměja, něšto cyle hinašeho předstajił. Wo rostliny w najšěršim zmysle mjenujcy scyła njepóńdźe, kaž dyrbjach tam na wopyće tele dny zwěsćić, wothladajo wot zahrodoweju mašinow. Ćim bóle běch překwapjeny, zo bě Renéjej Krollej prosće přeškoda, zawostajenstwo swojeje njeboh maćerje do črjopjenca ćisnyć. Snano móže něchtó to abo tamne hišće trjebać a změje swoje wjeselo z toho, je zakładna ideja Krollec mandźelskeju. Derje, zo tajke nastajenje w našej wjesnej kónčinje hišće mamy. Přehusto dźě dźensniši dźeń stary čapor na črjopjencu wotbywamy, njehladajo na ideelnu hódnotu, kotruž je bywši wobsedźer w nim widźał. A budźe-li na kóncu­ połojca za dobry zaměr, to čaporowe wiki we Wu­dworju na kóždy pad skulojći. Marian Wjeńka

Maja dołhodobne wizije za jězorinu

srjeda, 10. januara 2018 spisane wot:

Zaměrowy zwjazk přinošuje k wuwiću turizma na sewjeru Łužicy

Minjene lěta zličichu we łužiskej jězorinje stajnje něhdźe 600 000 přenocowanjow. „Wulka wizija wostawa dale milion přeno­cowanjow wob lěto. Na tym chce jězorinowy zwjazk kruće dźeržeć, a to je docpějomne“, podšmórny nawoda předsydstwa zaměroweho zwjazka Łu­žiska jězorina Braniborskeje Volker Mielchen na njedawnej regionalnej konferency w Hórnikečanskej Energijowej fabrice.

Zaměrowy zwjazk k wuwiću turizma w jězorinje we wulkej měrje přinošuje, Mielchen rjekny. Zaměr je, hač do lěta 2036 jedyn procent wjac přenocowanjow lětnje docpěć. Potenciale widźa zamołwići hłownje we wuwiću turizma za Złokomorowski, Sedlišćanski a Rański jězor. Dołhodobnje je při Złoko­morowskim jězoru (Senftenberger See) 400 000 přenocowanjow na lěto móžnych, je sej nawoda předsydstwa zaměroweho zwjazka wěsty. Při Sedlišćanskim jězoru (Seedlitzer See) móhło jich lětnje 50 000 a při Lejnjanskim (Geiers­walder See) respektiwnje Parcowskim (Partwitzer See) 100 000 być.

Za čistudnownu wodu

srjeda, 10. januara 2018 spisane wot:

Twarska naprawa k rozšěrjenju studnjow­ wot dotal štyrjoch na šěsć a rjedźernja dnowneje wody z brunicowych jamow pola Čorneje Pumpy je wotzamknjena. Kóšty a časowy plan su wšitke wobdźělene předewzaća dodźerž­eli.

Grodk/Sprjejcy (JoS/SN). W Sprjejcach (Spreewitz) maja nětko nowe studnje, kotrež maja do Sprjewicy běžacu zerzawu wodu zběrać­ a filtrować. Twar bě wšitkim zamołwitym wulke wužadanje. Dyrbjachu za to nowe trěbne roły kłasć, štož su wot lěta 2015 činili. Štyri króć prěkowachu dróhu, hdźež su wotpowědne sylne železne roły do zemje kładli. Nowe roły zwjazachu z hižo wobstejacymi pře­dewzaća Łužiska energija a milinarnje (LEAG). Wone transportuja dnownu wodu 4,5 kilometrow hač na industrijnišćo w Čornej Pumpje. Tam ju rjedźa, za čož je LEAG hłownje zamołwita.

Camp lětsa znowa přewjedu

póndźela, 08. januara 2018 spisane wot:

Přewjele młodostnych swoje rjemjeslniske wukubłanje přetorhnje

Budyšin (SN/at). Zrałosć za wukubłanje mnohe rjemjeslniske zawody pola młodostnych-wučomnikach paruja. Na to skedźbnja jednaćelka Budyskeho wo­krjesneho rjemjeslnistwa Sabine Gotscha-Schock z widom na starosće, zawěsćić powołanski­ dorost w firmach. Jako jara njespokojaca wšak wopokazuje so dale wulka ličba wučomnikow, kotřiž wukubłanje přetorhnu. „Wězo móža tu a tam problemy być a wukubłanske zrěčenje so kónči. Trajne přetorhnjenja mjez 20 a 25 procentami wukubłanja pak je prosće přewjele“, praji jednaćelka. Runje nětko, hdyž přeprošenja za mjezy- a rjemjeslniske pruwowanja wobdźěłuja, tónle jara mjerzacy staw znowa zwěsćeja. Zo nastupajo skónčenje wukubłanskeho poměra druhdy tež znjewužiwanje drogow rólu hraje, Gotscha-Schock njezamjelči.

Móža fleksibelnje na wiki reagować

pjatk, 05. januara 2018 spisane wot:

Změna k wobnowjomnym energijam w Němskej derje postupuje. Loni su wódne a wětřikowe připrawy něhdźe 154 kilowattowych hodźin miliny produkowali,­ štož je pjećina wjace hač w lěće 2016.

Budyšin/Choćebuz (SN/BŠe). Wětřika minjenych tydźenjow a dnjow dla su wětrniki wosebje wjele miliny produkowali, štož ma konsekwency za łužiske brunicowe milinarnje. „Hladajo na zwyšenje produkcije wobnowjomnych energijow wokoło hodownych swjatych dnjow a runočasnje jasnje mjenje trěbneje miliny za přetrjebarjow a industriju smy wukony našich štyrjoch milinarnjow w Janšojcach, Čornej Pumpje, Hamoru­ a Lippendorfje wo 25 procentow pomjeńšili“, informowaše nětko nawoda­ předsydstwa koncerna Łužiska energija a milinarnje (LEAG) Hubertus Altmann.

Mjez hodami a Nowym lětom bě koncern swoje milinarnje wjacekróć horje a zaso dele regulował, zo bychu přetrjebarjo stajnje dosć z milinu zastarani byli. Tež na wichor Burglind, kotryž je za­wčerawšim w Němskej howrił a so wo wyše wukony wětrnikow postarał, mó­žeše LEAG jara fleksibelnje reagować a stabilitu w milinowej syći zawěsćić.

Blidarjam nětko wjace płaća

pjatk, 05. januara 2018 spisane wot:

Hamburg/Schwerin (dpa/SN). We wuchodoněmskim blidarskim rjemjesle su so spočatk lěta 2018 mzdy za fachowych dźěłaćerjow wo 11,1 procent zwyšili, klětu maja wone wo dalše 4,4 procenty rozrosć. Tole předwidźi tarifowe zrěčenje, kotrež stej dźěłarnistwo IG metal a tarifowe zjednoćenstwo wuchodoněmskeho blidarskeho rjemjesła wujednałoj, zdźěli rěčnik dźěłarnistwa w Hamburgu.

Tak mjenowane róžkowe dochody zwyša so wot 1 958 na 2 175 a wot klětušeho potom na 2 262 eurow. Tarifowe zwyšenje płaći za 32 000 přistajenych w Braniborskej, Mecklenburgsko-Předpomorskej, Sakskej, Saksko-Anhaltskej a Durinskej, dźěłaja-li woni w zawodach rjemjeslniskeho zjednoćenstwa. Mzdy wučomnikow so w samsnej měrje zwyša.

Zastupnik dźěłarnistwa IG metal při tarifowych jednanjach Bodo Grzonka je sej wěsty, zo je powołanje blidarja z nowym tarifom zaso atraktiwne a přichodakmane. We wočomaj předsydy tarifoweho zjednoćenstwa Hansa Höflera je wuslědk jedanjow wulka kročel hladajo na to, zo so mzdy na wuchodźe a zapadźe přibližeja.

Miłe wjedro tyło

srjeda, 03. januara 2018 spisane wot:

Budyšin (CK/SN). We wuchodnej Sakskej bě kónc decembra 2017 dohromady 20 056 bjezdźěłnych, 636 wjace hač měsac do toho (+3,3 procenty) a 2 690 mjenje hač lěto do toho (-11,8 procentow). Miłeho­ wjedra dla zwosta ličba přizje­wjenjow bjezdźěłnosće z ratarstwa, twarstwa, transportnistwa kaž tež zahrodnistwa přehladna, kaž zwěsći předsyda jednaćelstwa Budyskeje agentury za dźěło Thomas Berndt dźensa na nowinarskej rozmołwje.

Naprašowanje za dźěłowymi mocami je porno nowembrej (-75 městnow, -35 procentow) a lětu 2016 (-165 městnow, -54 procentow) wosebje na sektorje časoweho dźěła woteběrało. Tuchwilu móže dźěłowa agentura 4 486 swobodnych městnow posrědkować.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND