Wodowe Hendrichecy (SN/BŠe). W třikrajowym róžku Němska, Čěska a Pólska chcedźa zamołwići kónčiny w zwisku krajinoweho rjadowanja bóle hromadźe dźěłać. Dźensa tydźenja su zamołwići zahajensku dźěłarničku pod hesłom „Tři kraje, jedyn přichod – zhromadne dźěło němskeho, pólskeho a čěskeho ruma“ we Wodowych Hendrichecach wotměli, na kotrejž bě mjez druhim Zhorjelski krajny rada Bernd Lange (CDU) přitomny. Na zarjadowanju předstajichu mjez druhim studiju Wrócławskeho instituta za teritorialne wuwiće. Dopóznaća su nětko dźěłowy zakład za dalše zhromadne dźěło. Zaměr je zhromadnu syć wutworić a kónčiny bóle „splesć“.
Hladajo na analyzu pólskeho instituta diskutowachu wobdźělnicy dźěłarnički wo memorandumje. Bernd Lange wupraji so za tajke zhromadne stejišćo. Na zakładźe memoranduma budźe nětko dźěłowa skupina wutworjena, kotraž měła so wosom króć zetkać a krutu strukturu z prawniskim zakładom zdźěłać. Dokumenty měli zhromadne mjezy přesahowace dźěło zesylnić. Zdobom móhli přikład za tamne regiony być.
Sprjejcy (JoS/SN). Wutwar Małeje Sprjewje mjez Bórkhamorom a wuliwom do Sprjewje w Sprjejcach je nimale dokónčeny. Wot Łužiskeje a srjedźoněmskeje towaršnosće za hórnistwowe zarjadnistwo (LMBV) zrěčensce wjazana firma Hagn Umwelttechnik ze Sulzemoosa je „swoje kófry nimale spakowała“. Nadawk je spjelnjeny, jenož zbytne dźěła maja hišće zdokonjeć. Jedyn z nich je wotstronić stary rołowód z přeměrom 1 600 milimetrow, kiž trjebachu za wotwodźenje wody z Wochožanskeje jamy do přitoka bywšeje rjedźernje za jamowu wodu w Nowej Wsy (Burgneudorf). Ćežku techniku zasadźeja, zo bychu přeprěkowanje roła spody rěčnišća wotstronili. Za to pobrjohaj wubagruja, rołu wuryja, wotrězk pod Małej Sprjewju wotrězaja a wotstronja. Na to twarskej wobłukaj zaso z pódu napjelnja a tež tu běh rěki zreguluja. To ma hač do kónca meje trać. „Wšitke dźěła časowemu planej wotpowěduja“, nowinski rěčnik LMBV Uwe Steinhuber zwěsći. „Sobu wupisane zwosadźenja a zawjazowace narunanske naprawy pobrjóžnych wobłukow traja hač do klětušeho.
Drježdźany (SN/BŠe). Drježdźanska rjemjeslniska komora je wčera a dźensa cyłkownje 73 rjemjeslniskich mištrow počesćiła, kotřiž su před 50 lětami swoje mišterske pruwowanje w Drježdźanskim komornym wobwodźe złožili. Wot wóčneho optikarja hač k blidarjam abo hornčerjam su mjez jědnaće žonami a 62 mužemi najwšelakoriše powołanja zastupjene.
Na zarjadowanjomaj w Drježdźanach wobdźělichu so zdobom zastupjerjo rjemjeslniskich zwjazkow a organizacijow, kotřiž angažement wustojnych a nazhonitych mištrow hódnoćachu. „Woni su so wo to postarali, zo mišterske zawody po cyłym swěće za kwalitu a ručne dźěło steja. Jako mištrojo su přez lětdźesatki wučomnikam swoju wědu sposrědkowali a sakski hospodarski region wuspěšnje sobu wobwliwowali“, zwurazni prezident Drježdźanskeje rjemjeslniskeje komory Jörg Dittrich.
Z Budyskeho wokrjesa su dźensa 15 rjemjeslniskim mištram wosebite wuswědčenje přepodali. Wčera su hižo jědnaće mištrow ze Zhorjelskeho wokrjesa w Drježdźanach počesćili.
Choćebuz (dpa/SN). Tuchwilna strukturna změna we Łužicy staja předewšěm strowotniski sektor před wulke wužadanja. Tejle wažnej temje je so njedawno tež najwjetša chorownja kraja Braniborskeje, Carla-Thiemowy-klinikum (CTK), w Choćebuzu na wosebitym kongresu wěnowała. Ćežišćo tworješe problematika falowacych strowotniskich fachowcow a fachowčow. Po podaćach chorownje chcedźa strowotniske a hladanske poskitki posłužbowarjow we Łužicy a Braniborskeje techniskeje uniwersity (BTU) zwjazać a přichodnje stabilne zastaranje zaručić. Tak chce CTK hač do 1 000 wukubłanskich městnow w swojej akademiji poskićić, připowědźi hladan- ska direktorka Andrea Stewig-Nitschke.
Kórjeń (AK/SN). Cyrkej měła strukturnu změnu we Łužicy konstruktiwnje přewodźeć a z fundowanym kubłanjom k tomu přinošować, bě wuslědk zarjadowanja w centrumje za dialog a změnu w Kórjenju (Kahren) pola Choćebuza, hdźež zaběrachu so wobdźělnicy z temu „Kubłanje a strukturna změna we Łužicy“. Na zarjadowanje přeprosyłoj běštaj generalna superintendentka ewangelskeho Zhorjelskeho cyrkwinskeho kruha Theresa Rinecker a Zhorjelski katolski biskop Wolfgang Ipolt. Zastupjerjo šulow, wosadow, komunalneje, krajneje a zwjazkoweje politiki wobdźělichu so na dialogu, kotryž jednaćelka ewangelskeho dźěłoweho zhromadźenstwa za dorostowe kubłanje w Berlinje a Braniborskej Barbara Hackenschmidt moderěrowaše.
Bjezdźěłnosć woteběra w Hornjej Łužicy a krótkodźěło wostanje kótwica stability za dźěłowe wiki. To stej jadriwej wuprajeni z měsačneho rozprawnistwa tudyšeje agentury za dźěło.
Hdyž za něšto tydźenjow w Njebjelčicach noweho wjesnjanostu wola, je Tomaš Čornak po 32 lětach zastojnstwo wotedał. Wotežki w komunalnym skutkowanju pak přiwšěm njewotpołoži. Tuchwilu ma so wón rozestajeć z informacijemi w interneće wo skutkowanju wjesnjanosty a gmejnskeje rady za komunu. Milenka Rječcyna je so z něhdy najmłódšim a dźensa z jednym z najnazhonićišich komunalnych politikarjow w Serbach rozmołwjała.
Sće měł stajnje wizije za swoju gmejnu. Su so tute w běhu lět změnili?