Jubilej wikow a zdobom kónc

póndźela, 03. apryla 2017 spisane wot:

Hospodarske wiki WIR, kotrež běchu stajnje wuspěšna pokazka hospodarstwa a rjemjesła regiona, wotměchu so kónc tydźenja jubilejny 25. raz a zdobom posledni króć w tej formje.

Kamjenc (JK/SN). To, štož bě so za kulisami hižo připowědźiło, wobkrući zamołwity organizator Andreas Heinrich, nawoda Budyskeho zarjada za wokrjesne wuwiće. „Wiki w tej formje hižo njebudu. Pytamy za nowymi móžnosćemi, region a jeho hospodarstwo předstajić a zajimcam prezentować“, rjekny wón k zakónčenju přehladki.

Najebać nimale lětnje wjedro su wiki mjenje, ale přiwšěm zajimowanych hosći přiwabili. Po pjatkownym zjawnym zahajenju witaše město Kamjenc zajimcow, jako zahaji kampanju jako kompetencny centrum za zhotowjenje baterijow.

W tradicionalnym kulinariskim wubědźowanju dźěše lětsa wo kołbasu a mjasowe wudźěłki. Nimo fachowcow z rězniskeho zjednoćenstwa Budyskeho wokrjesa bě jury tež zaso ze zjawnej prominencu wokrjesa wobsadźena. Zamołwity organizator, Worklečanski rězniski mišter Gerat Wałda, witaše hosći wubědźowanja ze serbskim postrowom.

Za lěpše zwiski w bliskowobchadźe

póndźela, 03. apryla 2017 spisane wot:

Zaměrowy wobchadny zwjazk zjawneho bliskowobchada Hornja Łužica-Delnja Šleska (ZVON) chce zaso železniski zwisk mjez Zhorjelcom a Wojerecami zmóžnić. Jězbny čas ma so wo dźesać mjeńšin skrótšić.

Budyšin (UM/SN). Na železniskej čarje mjez Wojerecami a Hórku budu wot decembra 2018 zaso wosobowe ćahi jězdźić. Zaměrowy wobchadny zwjazk zjawneho bliskowobchada ZVON je to na swojim posedźenju minjeny pjatk w Budyšinje hižo zašo hač planowane wotpowědnje rozsudźił. Kaž zastupny jednaćel zwjazka Christoph Mehnert wobkrući budu ćahi w dwuhodźinskim rytmusu jězdźić. Jězbny čas mjez Zhorjelcom a Wojerecami so potom wo dźesać mjeńšin na něhdźe hodźinu skrótši.

Budyšin (CK/SN). W měrcu bě we wuchodnej Sakskej 24 051 bjezdźěłnych re­gistrowanych, 1 239 mjenje hač měsac do toho. Po słowach Thomasa Berndta je nalěćo wočakowany rozmach na dźěłowych wikach přinjesło. Tole wotbłyšćowaše so w tym, zo potrjeba za fachowcami přiběraše, praji šef Budyskeje agentury za dźěło.­ Z 1 251 nowymi swobodnymi městnami přińdźe najwjetši dźěl znowa z firmow za dźěło na čas, ale ze 732 městnami tež nahladna ličba z předźěłaceho přemysła kaž mašinotwarstwa, metal­ předźěłaceje industrije a ze zhotowjenja picy. Kwota bjezdźěłnosće wučinja we wobłuku agentury dohromady 8,4 procenty. Rozdźělene po regionach saha paleta wot 4,2 procentow w Radebergu hač k 12,7 procentam w Zhorjelcu.

Kaž Thomas Berndt rozłoži, nima pohib na dźěłowych wikach jeno sezonalne přičiny. Sobudźěłaćerjo agentury móža tuchwilu 4 154 swobodnych dźěłowych městnow z winowatostnym socialnym zawěsćenjom poskićeć. To je štwórćina wjace hač před lětom. „Sym optimistiski, zo so dźěłowe wiki dale pozitiwnje wu­wija“, potwjerdźi Berndt.

Pozitiwny trend

pjatk, 31. měrca 2017 spisane wot:

Budyšin (SN/BŠe). Po sezonalnje widźanym typiskim postupje bjezdźěłnosće spočatk lěta nalěćo nětko zaso pozitiwny trend wujewja. Ličba přistajenjow je hladajo na wot wjedra wotwisne powołanje přiběrała. Porno měsacam do toho je tuž mjenje bjezdźěłnych.

Sobudźěłaćerjo Budyskeje dźěłoweje agentury móžachu aktualnje 4 000 nowych dźěłowych městnow sposrědkować. „Sym optimistiski, zo so dźěłowe wiki dale pozitiwnje wuwija. Chcemy přichodnje zhromadnje z předewzaćemi hišće bóle do zdoby­wanja personala inwestować“, zdźěli dźensa jednaćel Budyskeje agentury za dźěło Thomas Berndt. Předewšěm dźe agenturje wo to, ludźi za tuchwilne a přichodne dźěłowe městna a jich wužadanja kubłać. „Z kwalifikaciju dźě nastanu nowe šansy, a regionalne hospodarstwo trjeba fachowcow tež w přichodźe“, Berndt wuzběhny.

W Budyskim wokrjesu je tuchwilu 24 051 muži a žonow bjez dźěła. To je 4,0 procentow mjenje hač kónc februara. Bjezdźěłnostna kwota leži pola 8,4 procentow. Loni w samsnym času bě to 9,5 procentow.

Dowolowy region zwičnjeć

pjatk, 31. měrca 2017 spisane wot:

Turistiski zwjazk Łužiska jězorina mjeztym ze 128 čłonami

Rań (AK/SN). Łužiska jězorina ma so stać samostatny dowolowy region z wysokokwalitnymi přebywanskimi a gastronomiskimi poskitkami a ma přichodnje lětnje 1,5 milionow přenocowanjow docpěć. „To je naš hłowny zaměr, na tym dźěłamy“, podšmórny předsyda krajej Saksku a Braniborsku turistiskeho zwjazka Łužiska jězorina a krajny rada wokrjesa Hornje Błóta-Łužica Siegurd Heinze (njestronjan) wčera na nowinarskej konferency składnostnje pjećlětneho wobstaća zwjazka w Ranju (Großräschen). Wot 46 załoženskich čłonow w lěće 2012 je jich ličba hač do dźensnišeho na 128 rozrostła.

Wjeselu so z nimi!

pjatk, 31. měrca 2017 spisane wot:
Wuwiće energijowych wikow w minjenych lětach bě hižo do toho směra po­kazowało, štož so wčera po dołhej njewěstosći w Choćebuzu wobkrući. Łužisku brunicu za produkciju miliny hižo w tym mnóstwje kaž předwidźane njetrjebaja. Z rozsudom zwjazane su mnohe wosudy a přesłapjenja, ale tež nadźije. Wodychnyć móža ći, kotřiž smědźa w swojej domiznje wostać, dokelž njebudźe­ jama wokoło nich rozšěrjena. Zawěsće su sej ludźo w Rownom, Slepom, Wótšowašu, Grabku abo tež Kerkojcach wčera wječor připili a rozsud LEAG swje­ćili. Wjeselu so z nimi! Wobydlerjo Prožyma a dźělow Wjelceje pak dale třepotaja. Hakle­ w lěće 2020 chce LEAG tam wo dalšim postupowanju rozsudźić. Jasne je, zo so wčerawši rozsud na hospodarstwo regiona­ wuskutkuje. Nětko dyrbja politikarjo skónčnje reagować a wuměnjenja za strukturnu změnu tworić! Bianka Šeferowa

Za konkurencu njetrjebaja so chować

štwórtk, 30. měrca 2017 spisane wot:

Předewzaća wokrjesa maja podźěl na hospodarskim wuspěchu regiona

Jutře zahaja so 25. Kamjenske wiki pod hesłom „Hospodarstwo – informacija – region“

Hdyž jutře připołdnju jubilejne hospodarske wiki WIR w Kamjencu wotewru, njebudu serbscy rjemjeslnicy a přede­wzaćeljo zboka stać. Woni su hižo wjele lět swěrni wobdźělnicy přehladki wukonitosće wokrjesneho hospodarstwa.

Tež předewzaća ze susodneju krajow wobdźělene

Nalětnje słónco zemju wohrěwa a přiroda wotuća ze zymskeho spara. Najwjetši čas tuž tež za sobudźěłaćerjow Wochožanskeho parka błudźenkow nalětnje dźěła na płoninach zahajić.

Wochozy (AK/SN). Pjeć do šěsć tydźenjow je trěbnych, zo bychu we Wochožanskim parku błudźenkow cyłkownje ně­hdźe 130 družin lětnjeho wrjosa Calunia přitřihali, rozkładujetej sobudźěłaćerce parka Heike Michalk z Krynhelec a Erika Starke z Hamora. Wonej słušatej k 20 při­stajenym. Wosmjo z nich su krajinowi zahrodnicy. Tamni su z wobłuka turistiskeje informacije, zjawnostneho dźěła a zarjadnistwa, abo su domownicy.

Klaus Tschöke je park błudźenkow sobu wutworił. Do toho bě wón wjele lět pola Vattenfalla we wobłuku rekultiwowanje dźěłał. Dźensa je wón čestnohamtski jednaćel za personal a techniku w parku błudźenkow. „Pućiki po parku maja so wobstajnje přepruwować a wuporjedźeć“, wón rozkładuje. Cyłkownje ma park 7 000 metrow pućikow. „Ławki a dalše sedźenske městna dyrbimy prawidłownje reparować a płoty přehladać. Cyły park so nastajnosći přeměnja“, Klaus Tschöke rozłožuje.

Rumunska žnjowa pomocnica Erika Condrea pokazuje prěni lětuši hromak w nalětnim słóncu. Na dwanaćehektarskim polu błótowskeho ratarja Karla-Heinza Rickena w Zušowje pola Wětošowa su jón minjenu njedźelu žnjeć započeli. „Zažny termin žnjow smy z dwójnym tunlom docpěli. Na kóždej rynkaj přińdźe dalša folija, kotraž stara so wo přidatnu ćopłotu“, rozłožuje asistent jednaćelstwa Gernot Prowatschke. Foto: Peter Becker

Fachowcy prawidłownje pruwuja, hač kwalita žadanjam wotpowěduje

Poskitk pjekarjow na družinach chlěba zdawa so dźeń a wjetši być. Nimo tradicionalnych z měšaneje muki dominuje dale a wjac družin z podźělom strowych zornjatkow a symjenjow, kaž chia abo sesam. Tež chlěby, pječene z muku starych abo nimale zabytych žitnych družin, wabja dale a wjace kupcow.

Hač pak wšě te chlěby słodźa a hač jich kwalita wysokim žadanjam pjekarskeho rjemjesła wotpowěduje, hodźi so jeno z fachowym pruwowanjom zwěsćić. A to čini prawidłownje tež Budyske zjednoćenstwo pjekarjow. Za to maja njewotwisneho fachowca, kiž pruwuje w nadawku centrale za škit přetrjebarjow. Michael­ Isensee je tajka připóznata kapacita w pjekarskim rjemjesle. Nimo chlěbow wón tež w dohodownym času wosuški pruwuje.

Test za nowe ideje

nawěšk

nowostki LND