Zo předewzaća sobudźěłaćerjow pytaja, pokazuje so w přizjewjenych swobodnych dźěłowych městnach. W regionalnej dźěłowej agenturje rěča wo dalšim polěpšenju na dźěłowych wikach.

Budyšin (SN). Połoženje na wuchodo­sakskich dźěłowych wikach so tuchwilu zaso polěpša. Tale pozitiwna powěsć we wčera­wšej rozprawje Budyskeje wotnožki Zwjazkoweje agentury za dźěło zwobraznja, zo so tudyše hospodarstwo po zdźěla restriktiwnych wobmjezowanjach předewšěm druheho lockdowna koronapandemije dla zaso zhraba. „W nimale wšitkich branšach předewzaća zaso personal pytaja, tež we wosebje potrjechenych wobłukach“, praji Ilona Winge-Paul, operatiwna jednaćelka Budyskeje agentury za dźěło, a mjenuje hóstne přemysło kaž wobłuki wuměłstwo, zabawu a wočerstwjenje.

Zdobywanje fachowcow dale w srjedźišću steji, tajkich maja sej předewzaća zawěsćić. Jedne zwěsćenje po słowach Ilony Winge-Paul dale płaći: „Poradźowanje a spěchowanje dalekubłanja w firmach přistajenych bytostnje na wuznamje nabywatej. Fachowe mocy su na dźěłowych wikach jara požadane.“

Zajimcam, kotřiž chcedźa so w škiće přirody a wobswěta angažować, pobrachuja často móžnosće. Runje młódša gene­racija je minjene lěta na přikład z hibanjom Fridays for future pokazowała, zo chce politisce skutkować. Tak skići dobrowólne lěto na přikład we wobłuku ekologije móžnosće, něšto zeskutkownić. Młodźi ludźo w starobje 16 do 27 lět smědźa so wo tajke prócować. Poskitki nańdu pola přirodo- a wobswětoškitnych institucijow. Hač we wobłuku biologiskeho ratarjenja, wobswětoweho kubłanja abo w institucijach, móžnosće su najwšelakoriše. Nimo anga­žementa móža zajimcy tajke lěto zdobom jako powołansku orientaciju wužiwać.

Wot septembra 2020 je Elisabeth Schmidt swoje dobrowólne ekologiske lěto w zarjadnistwje biosferoweho rezerwata Hornjołužiska hola a haty wukonjała, kotryž tež UNESCO přisłuša. Po tym zo bě loni w awgusće abituru złožiła, wu­ži­waše młodostna z Budyšina móžnosć, swoje praktiske nazhonjenja w „zelenych powołanjach“ zběrać a so tak hladajo na stu­dijny směr zawěsćić.

Niska (UM/SN). Nišćanska wagonownja ma noweho jednaćela. Mjeztym połdra tydźenja nawjeduje Matúš Babík přede­wzaće w naslědnistwje Martina Weisenpachera. Eileen Müller z dźěłarnistwa IG metal wuchodneje Sakskeje rozsud wita. „Mějach hižo prěni dźeń zeznawansku rozmołwu z knjezom Babíkom. W njej so wujewi, zo podobnje myslimoj a hłuboko do stejnišća a do jeho přichodakmanych produktow wěrimoj. Mjeztym předleži prěni poskitk ze stron dźěłodawarja, kotryž budźemy w zhromadnym jednanju spočatk nowembra rozjimać.“ Dźěłarniska sekretarka poćahuje so na warnowanski stawk, wotměwacy so spočatk julija před wrotami ELH wagonownje Niska twzr. Tehdy bě so njewola dźěławych a IG metal mjez druhim přećiwo tomu měriła, zo njeje dotalne jednaćelstwo předewzaća hladajo na tarifowe žada­nje za šěsć procentami wjace mzdy zwólniwe było tomu wotpowědować. Při čimž je tele žadanje moderatne, wučinja dźě wotstawk k přestrjenjowemu tarifej 20 procentow.

Za čas po kóncu brunicoweje doby nałožuje Zwjazk miliardy eurow, zo by strukturu w potrjechenych kónčinach skrućił. Derje zapłaćene dźěłowe městna w dotalnymaj wobłukomaj hórnistwa a energijownistwa na podobnym niwowje narunać chcyć wostanje dale wulke wužadanje. Wobchadnorěčnje mjenujemy tónle proces změnu struktury. Zwjeršnje hla­dane njech to přitrjechi. Jeli pak přede­wšěm na hospodarskim polu tróšku dale borkaš, storčiš na njerymowanosće. Jedna tajka na přikład je, čehodla zamołwići zwjazkowi a krajni politikarjo tudyšim srjedźnostawskim předewzaćam aktiwnu rólu w tym procesu njepřicpěwaja? Dźěru w hornjołužiskim tworjenju hódnotow, kotruž za něšto lět brunicowe jamy a milinarnje w regionje zawostaja, maja druhe industrijne hałzy zapłatać. Při tym so na srjedźny staw zepěrać, w zwisku z jeho wužadanjomaj transformacije a digitalizacije přichod Hornjeje Łužicy sobu tworić, by wažny signal był. Axel Arlt