Mały Kólsk (JoS/SN). Geomobil Něm­sko-pólskeho UNESCO Global geoparka Mužakowski zahork su tele dny před cyhelernju w Małym Kólsku (Klein Kölzig) we wokrjesu Sprjewja-Nysa předstajili. Małobus z elektriskim ćěrjenjom, kotryž jězdźi hač do 220 kilometrow, su ze srědkami programa Interreg financowali. Wonkowne wuhotowanje wozydła je němsko-pólski team zarjadnistwa geoparka naćisnył. Wšitko praktisce zeskutkowniła je fachowa firma ze Żarow.

Derje wuhotowane laborowe a pólne wozydło skići mnohostronske zasadźenske móžnosće za projekty w přirodźe. Tak zmóžnjeja laborowe nastroje wodu, rostliny, kamjenje a pěsk přepruwować. Nimo toho su utensilije za geografiske wurywanja w Mužakowskim zahorku k dispoziciji.

Nalětnje wjedro do Błótow wabiło

srjeda, 05. meje 2021 spisane wot:
Tójšto dnjowych wulětnikarjow a domoródnych je rjane nalětnje wjedro 1. meje wuži­wało a so po błótowskich Bórkowach wuchodźowało. Mnozy pozastachu tež w Sprjewinym přistawje, hdźež dóstachu błótowske kórki we wjacorych družinach. Hosćo z Rudnych horin wšak rozprawjachu, zo móhli doma wokomiknje hišće sněha­kować, dokelž maja na tamnišich wjerškach hišće sněha dosć. Su pak so kaž hižo wjele lět za Błóta rozsudźili, byrnjež kofejownje a lodarnje zawrjene byli. Nětko so wšitcy nadźijeja, zo budu wobmjezowanja koronawirusa dla bórze zběhnjene a zo budu potom tež čołmiki zaso na groblach po puću. Foto: Michael Helbig

Za imageowu kampanju „Sorbisch? Na klar­.“ wuhotowany bus předewzaća Regionalny bus Hornja Łužica (RBO) je swoje rěčne poselstwo wot lońšeho februara hač do spočatka měrca 2021 po nimale 73 000 linijowych kilometrach šěrił. To wuchadźa ze statistiki, kotruž je wobchadna towaršnosć Serbskim Nowinam na naprašowanje zestajała.

„Serbski“ bus bě dotal na 49 linijach za 2 542 jězbow zasadźeny. Zdźěla jewjacemu so zaćišćej, zo bě wozydło tam, hdźež měło za našu maćeršćinu wabić, pječa přemało po puću, steja jasne, nawopačne potwjerdźace ličby napřećo.

Jenož nastupajo šěsć linijow njeje bus po serbskim sydlenskim rumje abo přez njón dale ke kónčnemu cilej jězdźił. Běchu to na přikład zwiski z Biskopic do Drježdźan, do Wopakeje a do Póckowow, Steinigtwolmsdorf–sakski Neustadt, abo tajkej w Hornim kraju z dohromady 185 jězbami po ně­hdźe 4 941 kilometrach.

W Njeswačidle chce młoda swójba historiske twarjenje zaso wožiwić

K charakteristiskim domam podłu železniskich čarow słušeja bjez­dwěla dwórnišća. Zastajenja železniskeho wobchada tež w Hornjej Łu­ži­cy, hdźež su na přikład zwisk mjez Budyšinom a Wojerecami za­wrě­li, je wjele prózdnych twarjenjow. W Radworju hižo něšto lět dwórnišćo kusk po kusku přetwarjeja. Mjeztym su so tež w Njeswačidle tajke twarske dźěła zahajili.

Dwórnišćo w Njeswačidle charakterizuje předewšěm twarska maćizna – palene cyhele, wužiwane za wonkownu fasadu. Twarjenje so wot tamnych w bliskosći wotzběhuje a wuprudźa něšto wosebite. To je jedna z přičin, čehodla je so Kristina Rječkec za nje zahoriła. „Přećel kaž tež ja smój njewotwisnje wot so přemyslowałoj, kak móhłoj najlěpje dwórnišćowy dom na swójbny domicil přetworić. Skónčnje smój so raz wo tym rozmołwjałoj a wobzamknyłoj, zo so wobhonimoj, komu Njeswačanske dwórnišćo słuša“, 36lětna powěda. Tuchwilu bydli młoda swójba hišće w Kamjenej pola Radworja. „Pytachmoj stajnje za domom z charakterom a ze stawiznami.“

Z Whatsapp a chatom

srjeda, 05. meje 2021 spisane wot:

Koronapandemija njezawinuje jeno za­wrjene šule, wona tež lětušich šulskich wotchadnikow při pytanju za wukubłanskim městnom njesměrnje poćežuje. Na­je­bać socialnu distancu je Drježdźanska rjemjeslniska komora móžnosće, wo wukubłanskich městnach so informować, rozšěriła. Wot spočatka apryla poskića komora Whatsapp-serwis za powołansku orientaciju, w kotrymž team wukubłanskich poradźowarjow w chaće spěšnje a njekomplikowanje na prašenja wotmołwja, a to k wólbje powołanja, k pytanju wukubłanskich městnow, k zarunanju wukubłanja atd. Tak reaguja na zwučenosć młodostnych, kotřiž mjez sobu rady přez Whatsapp komunikuja. Štóž chce chat startować, měł jeničce Whats­app-hotline Drježdźanskeje rjemjeslniskeje komory – 0351 4640-460 – jako kontakt na swojim šmóratku składować, a hižo hodźi so prěnja powěsć rozesłać. Alternatiwnje docpěješ wony chat direktnje ze šmóratkom abo tabletom pod .

Energijowy koncern Łužiska energija a milinarnje (LEAG) je swoje nalětnje zalěs­njenje w něhdyšich jamach kaž tež na bywšim wudobywanišću Choćebuz-sewjer a při nastawacym Choće­buskim wuchodnym jězorje po planje zakónčił.

Choćebuz (SN/JaW). 141 hektarow pło­niny je LEAG wot februara hač do kónca apryla cyłkownje zalěsniła, wona w nowinskej zdźělence informuje. Kaž z njeje dale wuchadźa, su z pomocu techniki něhdźe 900 000 štomikow zesadźeli. „30 hektarow smy w bywšej wuhlowej jamje­ Choćebuz-sewjer, dwanaće hektarow w Janšojcach, 20 ha we Wochozach, 49 w Rychwałdźe a 30 w Wjelcej zalěsnili. Pomhali su regionalni ratarjo a dalše partnerske zawody ze sadźenskimi ma­ši- nami. Na hektar bě to stajnje ně­hdźe 6 000 sadźenkow,“ pisa nowinski rěčnik LEAG Thoralf Schirmer.

Niwow kaž do krizy zaso docpěty

wutora, 04. meje 2021 spisane wot:

Ličba dotal wotzamknjenych wukubłanskich zrěčenjow je lětsa w Budyskim a Zhorjelskim wokrjesu zaso niwow kaž do koronapandemije docpěła. To je pozitiwna powěsć z Drježdźanskeje rjemjeslniskeje komory.

Drježdźany (SN/at). 529 młodych ludźi je so hač do kónca apryla hižo rozsudźiło, zo chcedźa so po wuchodźenju šule we wuchodosakskim rjemjeslnistwje wukubłać dać. W ličbje ma Drježdźanska rjemjeslniska komora spad za přewinjeny, kotryž dyrbjachu loni w fazy prěnjeje žołmy koronapandemije dla zwěsćić. Před lětom předležeše z mjenowaneje přičiny 435 podpisanych wukubłanskich zrěčenjow we wuchodnej Sakskej. Do­pokaz wróćenja k wěstej dokoronowej normaliće dowola přirunanje z aprylskej ličbu před lětomaj. Tehdy bě dohromady 512 žonow a muži wukubłanske zrěčenje z tudyšimi rjemjeslniskimi zawodami kruće wotzamknyło.

Na jeničkej manifestaciji dźěłarnistwa DGB we wuchodnej Sakskej k 1. meji steje­še solidarita za čas koronapandemije a předewšěm tež po tym w srjedźišću. Něhdźe 70 ludźi bě z přistojnosću, wotstawkom a nahubnikom předwčera­wšim na Budyske Žitne wiki přišło.

Budyšin (SN/at). „Sylny socialny stat je nam přez krizu pomhał, a je so pokazało, zo wiki wšitko njerjaduja. Pandemija pak je socialne njerunosće dale přiwótřiła a njedostatki jasnje wotkryła“, rjekny Anne Neuendorf. Tohodla trjebamy sprawniši dawkowy system. „Na financowanju zhromadneho byća maja zamóži a superbohačcy jasnje sylnišo wobdźěleni być.“

Woprawnjene žadanje

póndźela, 03. meje 2021 spisane wot:
Njespokojnosć městopředsydki DGB Sakskeje Anne Neuendorf na mejskej mani­festaciji w Budyšinje njebě přesłyšeć. Dźěłarnistwa, a tu wosebje IG BCE, su ze swojim protestami bytostnje k tomu přino­šowali, zo přewostaja Zwjazk sumy miliardow eurow za strukturnu změnu po kóncu zmilinjenja brunicy. Tuchwilny kurs sakskeho knježerstwa w naležnosći po słowach dźěłarnicy pak runjewon wo tym njeswědči, zo by wěcywustojnosć dźěłarnistwow nastupajo rozsudy za zapodate projekty abo přećiwo nim cyły proces wobohaćiła. Neuendorf žadaše sej wot Sakskeje z prawom městno dźěłarnistwow za blidom rozsudźerjow, zo móhli so skutkownje wobdźělić. Wšako zastupuja dźěłarnistwa zajimy swojich čłonow, kotřiž dźěłowe městno w brunicowych jamach a milinarnjach zhubja. Trěbne potajkim su naročne, derje zapłaćene joby. Nic tajke zwonka Łužicy abo ze snadnej mzdu, kotrychž­ je tež we wo­krjesomaj Budyšin a Zhorjelc hižo přewjele. Axel Arlt

Pandemija haći spěchowanja

štwórtk, 29. apryla 2021 spisane wot:

Budyšin (SN). We wuchodnej Sakskej je w aprylu 19 051 bjezdźěłnych, 531 resp. 2,7 procentow mjenje hač w měrcu. ­Kwota bjezdźěłnosće je na 6,8 procentow spadnyła, kaž Budyska wotnožka Zwjazkoweje agentury za dźěło dźensa informuje. Zo je so zaso wjace ludźi do dźěła dóstało, zwisuje z typiskim nalětnim ­wožiwjenjom dźěłowych wikow. „Předewzaća swojich sobudźěłaćerjow hłownje we wonkownych powołanjach zaso při­sta­jeja, na twarnišćach, w ratarstwje abo zahrodnistwje“, pisa Kathrin Groschwald, předsydka jednaćelstwa Budyskeje agentury.

Nastupajo dźěłowe wiki druhe faktory pozitiwny wliw nalětnjeho wožiwjenja wobmjezuja. „Naprašowanje za personalom je so porno časej do koronapandemije wosłabiło. Nimo toho móžemy pod tuchwilnymi wobmjezowanjemi pandemije dla mjenje spěchowanskich naprawow přewjesć“, Groschwald zwěsća.

Porno aprylej 2020 je tak mjenowana poddźěławosć – ličba wosobow, kotrež su bjezdźěłne abo wobdźěleja so na dźěłowičnych naprawach –, wo 1,6 procentow na nětko 23 048 woteběrała.

Serbska debata

nowostki LND