Ow, to boli

srjeda, 03. februara 2016 spisane wot:

Choćebuz/Budyšin (SN). Wjacore komuny Hornjeje Łužicu budu dyrbjeć hižo wupłaćeny lońši přemysłowy dawk energijowemu koncernej Vattenfall wróćo płaćić. Wo tym je Vattenfall gmejny a města tele dny informował. Koncern wopodstatnja wróćopłaćenje z dale a hubjeńšej bilancu a z hospodarskim minusom 2,6 miliardow eurow, a to jeničce loni w prěnim połlěće. Deficit wuskutkowali su dale spadowace płaćizny za milinu kaž tež niske płaćizny wolija, płuna a wuhla scyła.

Hižo w lěće 2014 bě sej Vattenfall wot komunow žadał, přemysłowy dawk wróćo­ płaćić. Napominanje, nětko lońše dawki wróćo płaćić, dóstanu gmejny a města w přichodnych dnjach. W Hornjej Łužicy płaći Vattenfall přemysłowy dawk w gmejnach Halštrowska Hola, Slepo­, Sprjewiny Doł, Trjebin a Běła Woda. Wróćopłaćenje dawka zawinuje w kasach komunow wulke dźěry a nuzuje je k zdźěla drastiskim naprawam. Mnohe gmejny su pjenjezy kruće a zaměrnje do hospodarskeho plana zatwarili. Pjenjezy nětko zaso wuzbytkować budźe wšo druhe hač přijomne.

Hospodarstwo trjeba techniskich fachowcow

wutora, 02. februara 2016 spisane wot:

Technikar je wjac hač jenož derje wukubłany rjemjeslnik, kiž zdokonja mašiny abo nastroje wuporjedźeć. Hospodarske wuwiće žada sej mnohostronsce wukubłaneho a na wyšinje časa steja­ceho fachowca.

Budyšin (SN/JK). Hospodarske a techniske wuwiće srjedźostawskich předewzaćow wotwisuje wot derje wukubłanych fachowcow. Jedyn z nich je statnje pruwowany technikar. Njeje to jenož wysoko kwalifikowany rjemjeslnik, ale fachowy dźěłaćer, kiž zamóže rjemjeslniske kmanosće z techniskimi móžnosćemi načasneje produkcije a techniki zjednoćić.

Wažnosć technikarja jako fachoweje mocy za wuspěšne hospodarstwo w Sakskej dale wuzběhnyć je zaměr lětušeho 7. myta technikarja. K wubědźowanju wo myto namołwjene su wšitke sakske wukubłanišća, poskićace techniske wukubłanje. To su nimo srjedźišćow techniskeho wukubłanja w Lipsku, Kamjenicy a Drježdźanach wosebje powołanske a techniske šule po cyłej Sakskej, w hustej syći mjez sobu splećene.

Lětsa dotal wjace bjezdźěłnych

wutora, 02. februara 2016 spisane wot:

Budyšin (CK/SN). W januarje bě w Budyskim a Zhorjelskim wokrjesu 28 733 bjezdźěłnych. To je 2 513 wosobow wjace hač w decembrje. Po słowach Thomasa Berndta ma so to jako „jasnje přiběraca bjezdźěłnosć“ hódnoćić. Přičiny su hłownje sezonalneho razu, rjekny dźensa šef Budyskeje agentury za dźěło. Z 1 500 ludźimi pochadźatej nimale dwě třećinje tych, kotřiž su wot spočatka lěta dźěło zhubili, z branšow typiskich sezonowych powołanjow, kaž su to twarske přemysło, zahrodnistwo a krajinotwarstwo, ratarstwo a lěsnistwo. Nimo toho běchu wosebje mužojo potrjecheni.

W statistice dale pytnješ, zo su kónc lěta wobmjezowane dźěłowe zrěčenja wuběželi. Za překwapjacy ma Thomas Berndt fakt, zo je kwota bjezdźěłnosće po wšej Hornjej Łužicy najebać zymske pušćenja z 9,9 procentami dale jednocyfrowa wostała. Kwota pak dale bytostnje chabła, mjez 5,1 procentom w Radebergu a 14,1 procentom w Zhorjelcu.

Porno ličbje w januarje 2015 je nětko 3 620 bjezdźěłnych mjenje.

Łužica a Serbja z mnohimi poskitkami

póndźela, 01. februara 2016 spisane wot:

Wjace hač 30 000 wopytowarjow rozhladowaše so wot pjatka hač do wčerawšeho na Drježdźanskich pućowanskich wikach. Na 20 000 kwadratnych metrach wabješe tam 400 stejnišćow za wočerstwjenje, hojenje a turistiske cile w dwanaće europskich krajach a za safarije w Africe.

Drježdźany (ML/SN). „Čorny kontinent“ předstaji so ze swojimi mnohimi wulětnymi móžnosćemi, předewšěm w Južnej Africe, Keniji a Marokku. Kupa Madagaskar bě lětsa partnerski kraj Drježdźanskich turistiskich wikow.

Što budźe po Vattenfallu?

póndźela, 01. februara 2016 spisane wot:

Drježdźany (SN/JK). Wokomiknje hišće jednaja, što pak budźe z Łužicu, hdyž budźe­ brunicowa sparta energijoweho koncerna Vattenfall předata a Vattenfall so z Łužicy wróćo sćehnje.

Powołanske šansy w regionje su tak dobre kaž hišće ženje do toho. To je sobotna přehladka „nawi přichoda“ w Budyskej studijnej akademiji wotbłyšćowała. Wustajerjo mějachu na tójšto prašenjow wotmołwjeć a su zdobom rosćacy zajim wopytowarjow zwěsćili.

25. róčnicy podpisanja němsko-pólskeho zrěčenja wo dobrym susodstwje a zhro­madnym dźěle, na to złožowacemu so skutkowanju Mjezynarodneje rady dźěłarnistwow Łobjo-Nysa a rozžohnowanju Bernharda Sonntaga ze zastojnstwa jednaćela DGB wuchodneje Sakskeje bě wčera přijeće DGB Sakskeje w Budyšinje wěnowane.

Kaž wulka swójba

srjeda, 27. januara 2016 spisane wot:

Husto słyšimy, zo ma rjemjesło złote dno. Na wěste wašnje so to na rjemjeslniskich wikach přeco zaso pokazuje. Tež minjeny kónc tydźenja w Choćebuzu tomu tak bě.

W Choćebuzu wotmě so minjeny kónc tydźenja fachowje wusměrjena wustajeńca. Němske pomjenowanje „HandWerker“ zaměr prezentacije rjemjeslniskich a posłužbowych předewzaćow Łužicy na přeswědčiwe wašnje zjima. Přewažnje braniborske firmy, tež łužiske a mjez nimi serbske, so w Choćebuzu zajimowanemu a fachowje derje nastajenemu publikumej předstajichu. Hižo wjacore lěta witaja na wikach tohorunja rjemjeslnikow z Čěskeje a Pólskeje.

Běše něhdy wulke stadło wowcow. Skoćata so derje čujachu, přetož mějachu wowčerja, kiž so z wjele lubosću wo nje staraše. Činješe wšitko za nje. Nihdy njeby jemu do mysli přišło, ze swojimi wowcami hrubje wobchadźeć abo jim něšto złe načinić. Wyšnosći wšak so tole njespodobaše. Wona chcyše zwěrjata zwičnić a lěpši dobytk nadźěłać. Wowčerja tuž pušći, wumjetujo jemu, zo je sej z wowcami lěpšiny wuzbytkował. Tón wšak wumjetowanja wotpokaza, ale po­darmo. Wyšnosć pósła noweho wowčerja, kiž z cyle hinašimaj wočomaj na wulke stadło zhladowaše, bě dźě po powołanju rěznik.

Z tymle přirunowanjom drje hodźi so najlěpje wopisować, što je so minjene lěta w biosferowym rezerwaće Hornjołužiska hola a haty stało. Mjeztym je tam­niše wuwiće politisku runinu docpěło a je zdobom přičina wjacorych listow sakskemu ratarskemu ministrej.

Minimalna mzda žadyn chaos njewuskutkowała

srjeda, 27. januara 2016 spisane wot:

Budyšin (SN/JK). Lěto po zawjedźenju zakonsce předpisaneje minimalneje mzdy je dźěłarnistwo zežiwjenje a hosćencarstwo (NGG) Budyskeho wokrjesa z wuslědkom wažneho podawka nadměru spokojom. „Prěni raz maja wšitcy přistajeni krutu zakładnu mzdu, wot kuchinskeje pomocy hač k předawarce. Štóž dźěła, ma tež znajmjeńša 8,50 eurow na hodźinu dóstać“, praji Volkmar Heinrich, jednaćel NGG za wobłuk Drježdźany a Kamjenicu. Zdobom wón podšmórnje, zo njejsu so negatiwne wočakowanja hladajo na wuskutki minimalneje mzdy wobkrućili. „Minimalna mzda njeje so jako spinadło konjunktury wopokazała, tež dźěłowe městna so zhubili njejsu. Město toho zo bychu w hosćencach a hotelach personal redukowali, su dalšich sobudźěłaćerjow přistajili. We wobłuku gastronomije dźěłaše loni w juniju 9,7 procentow wjac ludźi hač w samsnym času lěto do toho.

Ličba bjezdźěłnych je so w prěnim lěće minimalneje mzdy na spodobne wašnje pomjeńšiła, město toho zo by nadměru rozrostła, kaž bě wěšćene. W decembru bě 11,6 procentow ludźi mjenje bjez dźěła hač w lěće 2014.

nawěšk

nowostki LND