Mólby wosrjedź energije

štwórtk, 17. septembera 2015 spisane wot:
W foyeru hłowneho zarjadnistwa koncerna Vattenfall w Choćebuzu su wčera wustajencu z mólbami Hartmuta Pinieka wotewrěli. Hromadźe z molerjom wobhlada sej pokazku wulkoformatnych mólbow a grafikow pod hesłom „Wid na kraj“ tež nawodnica delnjoserbskeho wotrjada za rěčne kubłanje ABC dr. Christiana Piniekowa. Hartmut Piniek je we 80tych lětach mjez druhim tež portret prof. Pawoła Neda molował. Foto: Michael Helbig

Změny derje přihotować

srjeda, 16. septembera 2015 spisane wot:

Lětuše Budyske předewzaćelske dny (BUT) wotměja so hišće raz po lońšim přikładźe. Nowe ideje a změny za přichodne lěta wotwisuja wot nowych ludźi w Budyskej radnicy.

Budyšin (SN/JK). Hdyž dźensa wječor krajny rada Michael Harig (CDU) a Budyski wyši měšćanosta Alexander Ahrens (njestronjan) firmownikow wokrjesa na Budyske předewzaćelske dny witataj, po­běži wšitko po přikładźe minjenych lět.

Lětuše BUT wotměja so hišće raz po dotal zwučenym wašnju. Kaž nawoda zarjada za hospodarske spěchowanje Bu­dyšina Alexander Scharfenberg zdźěli, maja wotpohlad, klětu dalšich partnerow do přihota a přewjedźenja BUT zapřijeć. „Najprjedy měłoj so wyši měšćanosta Alexander Ahrens a hospodarski měšćanosta dr. Robert Böhmer k swojim předstawam wo BUT wuprajić. Wobaj dyrbitaj so do noweje zamołwitosće w radnicy zadźěłać. Zawěsće pak mataj wosobinske předstawy, kak móhli za Budyšin wažne předewzaćelske dny koncipowane być“, wuzběhny Scharfenberg.

Tworićel łužiskeje jězoriny

srjeda, 16. septembera 2015 spisane wot:

Dwaceći lět towaršnosć LMBV krajinu wuspěšnje rekultiwuje

Na swjedźenskim zarjadowanju składnostnje 20lětneho wobstaća Łužiskeje a srjedźoněmskeje towaršnosće hórnistwoweho zarjadnistwa (LMBV) staji sakski ministerski prezident Stanisław Tilich mjez druhim prašenje: „Što přińdźe po brunicy?“ Wotmołwu je sam dał: „LMBV!“

Tomu tak je, a to wažnosć a trěbnosć wulkeho předewzaća na cyle krótke wašnje zjima. Za hódnoćenje jeho wažnosće a nadawkow je wažne, so trochu na pozadk a wuwiće LMBV dopomnić. Wona je zwjazkowa towaršnosć, słušaca stoprocentowsce Zwjazkej, kotruž Zwjazk po 75 procentach kaž tež Sakska a Braniborska po 25 procentach financuja. 1995 nasta wona po hromadupołoženju towaršnosćow hórnistwoweho zarjadnistwa Łužicy (LBV) a srjedźneje Němskeje (MBV) a přewza tak zamołwity nadawk, hórnisku naslědnu krajinu saněrować.

Wažne su zhromadne wuslědki

srjeda, 16. septembera 2015 spisane wot:

Gmejna Trjebin a Vattenfall stej spjelnjenje­ zakładneho zrěčenja z lěta 2008 bilancowałoj. Tójšto hodźeše so na dobro wobydlerjow a gmejny zwoprawdźić­.

Zakładne zrěčenje mjez gmejnu Trjebin a energijowym koncernom Vattenfall je w dalokej měrje spjelnjene. „Hišće zakónčić maja so doskónčny wutwar pućow a někotre zwosadźenja“, podšmórny Trjebinska wjesnjanostka Kerstin Antonius (Wolerske zjednoćenstwo Trjebin) na njedawnym posedźenju gmejnskeje rady. Zhromadnje z Joachimom Kretschmerom, kiž je pola Vattenfalla zamołwity za wobłuk twarstwo/hórniske škody, a Wolfgangom Zechom, wěcywobdźěłarjom za twarstwo w Trjebinskej gmejnje, předstaji wona wuslědki dotalneho dźěła.

Za čistu Sprjewju

wutora, 15. septembera 2015 spisane wot:

Zły Komorow (SN/JK). W boju přećiwo zežołtnjenju Sprjewje a za spěšniše čisćenje dnowneje wody wuhlowych jamow zahaji saněrar hórniskeje naslědneje krajiny, Łužiska a srjedźoněmska towaršnosć hórnistwoweho zarjadnistwa (LMBV), dalšu naprawu. Blisko Noweje Wsy w gmejnje Sprjewiny Doł nastanjetej hłubokej studni, kotrejž matej wodu hižo w předpolu Sprjewje přiwzać a ju po filtrowanju a prěnim čisćenju w dołhich rołach do čisćernje za dnownu wodu w industrijnišću Čorna Pumpa wjesć.

Studni stej dalši přinošk LMBV k tomu, zo so podźěl železoweho hydroksida w Sprjewi pomjeńši. Wonej wšak měłoj po planje hižo dźěłać, techniskich problemow dla pak móža trěbnu techniku hakle nětko zatwarić. Kaž nowinarski wotdźěl LMBV zdźěli, matej studni wot oktobra na probu dźěłać. Jeli wšo derje poběži, budu jej wot klětušeho z doskónčnej hotowosću a połnej kapacitu wužiwać móc. Princip čisćenja wody je tón, zo so we hłubokich studnjach woda wuhlowych jamow wotklumpa a prjedy hač do Sprjewje abo jeje přitokow běži, w nowych studnjach zběra.

Zwiski polěpšić

wutora, 15. septembera 2015 spisane wot:

Budyšin (SN/JK). Po dojednanju wo lěpšim železniskim zwisku mjez Němskej a Pólskej je načasu, zo tež w Sakskej wotpowědne naprawy k polěpšenju železniskeho wobchada přewjedu.

Zapósłanc krajneho sejma Marko Šiman (CDU) sej žada, zo so ručež móžno zahaji elektriski wutwar čary z Drježdźan do Zhorjelca. Za dalše dlijenje njeje hižo přičiny, měni zapósłanc a wočakuje skónčnje konkretny rozsud zwjazkoweho hospodarskeho ministerstwa. „Nam ničo njepomha, hdyž so plany na čas po lěće 2020 přestorča. Trjebamy nětko připrajenje, zo móhli z trěbnymi dźěłami hišće do lěta 2018 započeć“, Šiman wuzběhny. Čara je mjezynarodnje wuznamna a trěbna. Tohodla měła wona wutwarjena a pobrachowacy dźěl železniskeho zwiska mjez wuchodnej a zapadnej Europu bórze elektrifikowany być.

Sakski hospodarski minister Martin Dulig (SPD) je hižo w juniju podpisał planowanske dojednanje wo elektrifikaciji čary a je tak Němskej železnicy připrajił zwólniwosć Sakskeje, projekt podpěrać. Tři miliony eurow přewostaji swobodny stat za předplanowanje.

Wočaknu rozsud sudnistwow

pjatk, 11. septembera 2015 spisane wot:

Rychbach (SN/JK). Regionalny planowanski zwjazk Hornja Łužica-Delnja Šleska je so wčera na swojej 90. zwjazkowej zhromadźinje w Rychbachu pola Zhorjelca schadźował.

Gremiji wuradźowaše mjez druhim wo hospodarskim planje přichodneho lěta. Doskónčnje so čłonojo zwjazka hišće na wšitke nadrobnosće dojednać njemóžachu. Tak budu naćisk plana na přichodnej zhromadźiznje kónc oktobra w Zhorjelcu dale rozjimać. W dalšim dypku zabrachu čłonojo zwjazka stejišćo k namjetej dźělneho plana­ wužiwanja płonin za produkowanje wětroweje energije, štož ma regionalne planowanske zhromadźenstwo Łužica-Błóta planowane. Wotpohladej, stejnišćo za wětrniki planować, je planowanski zwjazk wčera přihłosował.

Prěnju namołwu móža wudać

srjeda, 09. septembera 2015 spisane wot:

Rakecy (SN/JK). Zdźělenka wo přizwolenju srědkow za prěni schodźenk spěchowanja je dźensa dóšła. To zdźěli regionalny manager Leaderoweje kónčiny Hornjołužiska hola a haty Rudolf Rychtar na naprašowanje Serbskich Nowin. Ručež móžno chcedźa ju na internetnej stronje wozjewić a zdobom wšitkim, kotřiž su dotal projekty zapodali, zdźělić, zo smědźa spěchowansku próstwu stajić. Wotpowědna namołwa k přizjewjenju slěduje. Hač do kónca oktobra maja so próstwy za prěnju spěchowansku namołwu w regionalnym běrowje w Rakecach zapodać. Rozsudźacy gremij potom wo přidźělenju srědkow na swojim zetkanju 30. nowembra rozsudźi.

Za prěnju spěchowansku dobu je 850 000 eurow k dispoziciji. Z nimi maja so projekty k wuwiću a zachowanju wjesnych strukturow a wosebitosćow w dwurěčnym regionje Hornjeje Łužicy podpěrać. Projekty, kotrež so w prěnim kole njewobkedźbuja, hodźa so po přichodnej namołwje znowa zapodać.

Z komisiju rěčeć

wutora, 08. septembera 2015 spisane wot:

Stara Darbnja/Brüssel (SN). Ze składowanjom błóta ze železowym hydroksidom w Starodarbnjanskim jězoru budźe so nětko tež Europska unija zaběrać.

Zastupjerjo wobydlerskeje iniciatiwy Starodarbnjanski jězor a zapósłancy Krajneho sejma Braniborskeje Dieter Dombrowski (CDU), Roswitha Schier (CDU) a Heide Schinowsky (Zeleni) chcedźa so jutře w Brüsselu z generalnej direkciju Europskeje unije za wobswět wo problemje błóta rozmołwjeć. Na naprašowanje frakcije CDU w braniborskim sejmje w aprylu je komisija EU zdźěliła, zo ma starosće wobydlerjow hladajo na wuskutki składowanja železoweho hydroksida w Starodarbnjanskim jězoru za woprawnjene. W Brüsselu chcedźa wotmołwy namakać na prašenja wobydlerjow, kotrež su w katalogu zjimali. Z rozmołwu ze zamołwitymi EU spjelni Dieter Dombrowski přilubjenje z měrca, naležnosć wobydlerskeje iniciatiwy komisiji EU přednjesć.

Přećiwo planowanemu składowanju błóta w jězoru hiba so hižo dlěši čas protest. Peticiju wobydlerskeje iniciatiwy je mjeztym 6 000 podpěrarjow podpisało.

Łužicu dotal wuspěšnje saněrowali

póndźela, 07. septembera 2015 spisane wot:

Zły Komorow (SN/JK). Mócnje klinčeše minjeny pjatk hórniska hymna po swjedźenskim stanje w Złym Komorowje. Znamjo to, zo bě so swjatočny dźěl zarjadowanje składnostnje 20lětneho wobstaća Łužiskeje a srjedźoněmskeje towaršnosće hórnistwoweho zarjadnistwa (LMBV) skónčił a zawodny swjedźeń nimale 700 přistajenych předewzaća zahajił.

W swojich postrownych słowach hódnoćachu do toho ministerskaj prezidentaj Braniborskeje Dietmar Woidke (SPD) a Sakskeje Stanisław Tilich (CDU) kaž tež zastupjer zwjazkoweho knježerstwa, parlamentariski statny sekretar Jens Spahn (CDU) wuspěchi wuchodoněmskeho předewzaća za rekultiwowanje a saněrowanje hórniskeje naslědneje krajiny.

„We Łužicy je so telko na dobro kraja změniło, wo čimž njejsmy spočatnje žane prawe předstawy měli“, wopisowaše Dietmar Woidke změny we Łužicy. Wón wupraji so za dalše wuwiće brunicoweho hórnistwa a wuzběhny, zo wostanje energijowe hospodarstwo dale žro Łužicy. Wšo druhe by po jeho słowach wopak było. Za to­ žněješe wón sylny přiklesk a mócne přihłosowanje přitomnych.

nawěšk

nowostki LND