Kachlestajer a kachlicarski mišter Šćěpan Čornak zhladuje na 25lětne wobstaće swojeje firmy
Cyle sam na so stajeny je započał. Z Trabantom-kombijom jězdźeše něhdy k wužiwarjam swojich posłužbow. „Dyrbjach so chětro hibać. Dyrbjach zwiski k ludźom, twarskim a tepjenjetwarskim firmam nawjazać, sej kóždy pjenježk z pilnym dźěłom zasłužić. To bě ćežki a napinacy čas“, dopomina so Konječanski rjemjeslnik Šćěpan Čornak na spočatki swojeje firmy. „Dowěru zasłužiš sej jeno z dobrym, wobstajnym a kwalitnym dźěłom.“ Před 25 lětami zwaži sej wón krok do samostatnosće. Bě to čas zazběha a euforije. Tehdy njemějachu we wsy hišće krutu telefonowu syć. Terminy dojednawaše sej tuž z telefonoweje chěžki abo wosobinsce na městnje. Prěnje nadawki dósta na wsach wokoło Klóšterskeje wody, w Kamjenskim, Wojerowskim, Biskopičanskim a Budyskim regionje. Krizy w twarstwje dla wot lěta 1998 do 2006 běchu to tež montažowe twarnišća po wšej Němskej a samo w Danskej. „Zdobom bě to čas špatneje płaćenskeje moralki. Druhdy dyrbjach zasakle wo swoju mzdu wojować“, Konječan powěda.
Kachle a woheń jeho fascinuja