Něšto tydźenjow dyrbjachu so Worklečanske žony druhdźe frizěrować a mužojo sej włosy třihać dać, dokelž bě jich wjelelětny salon pódla bywšeho hosćenca začinjeny. To so přichodnu póndźelu změni.

Worklecy (SN/MWj). Štóž je wčera přez wukładne wokno Worklečanskeho frizerskeho salona pohladnył, widźeše tam hišće po wšěch rumnosćach twaršćizny rozdźělene. 14. oktobra pak chce Kathrin Heine tu nowy frizerski salon wotewrěć. Z Róžanta pochadźaca a nětko we Worklecach bydlaca frizerka chcyše so rady zesamostatnić. Jako so jej móžnosć we Worklecach skićeše, spózna swoju šansu a ju přiwza. Jeje wotpohlad je tež gmejna podpěrała a na swójske kóšty nowe špundowanje składła.