Drježdźany (SN/BŠe). Wobswětowa syć Zelena liga so zaměrnje za to zasadźa, wohrožene wsy a přirodu rozpřestrěwacych brunicowych jamow dla zachować. K tomu su iniciatorojo minjeny tydźeń w Drježdźanskej cyrkwi nadźije fotowu přehladku z mjenom „Njepředajomny“ wotewrěli, při čimž dźe wo wohroženy lěs blisko Wochožanskeje jamy. „Lěsna ležownosć, kotruž wobsedźerjo koncernej Łužiska energija a milinarnje (LEAG) předać nochcedźa, smě Choćebuska wobswětowa skupina hač do lěta 2037 wotnajeć“, rozłoži Renej Šuster ze Zeleneje ligi pozadk přehladki.
Přestrjeń, wo kotrejž je rěč, leži na polu čisło jedyn Wochožanskeje jamy. Zo móhli areal wotbagrować, ma LEAG wotpowědne jednanje zahajić, za kotrež dybjeli wobsedźerjo lěs předać. „Dobrowólnje lěs njewotedam, zo bychu jón zničili. Hač je wuswojenje za brunicowe jamy hišće zwoprawdźomne, to maja zarjady a sudnistwa rozsudźić“, Šuster připowědźi. „Zachowany lěs pak by pomhał susodne wsy před haru a prochom jamy škitać.“
