Wokrjes garantuje wobstaće serbskich a serbšćinu podawacych šulow
Budyšin (SN/MiR). Domowina je so zaběrała z naćiskom za přichodny plan šulskeje syće, kotruž bě Budyski wokrjes zdźěłał. Zapřijał a za stejišćom prašał je so třěšny zwjazk Serbow potrjechenych, mjez kotrymiž su serbske a serbšćinu wuwučowace šule a jich nošerjo, zastupjerjo třěšneho zwjazka w šulskich konferencach, Serbske šulske towarstwo a kubłanski wuběrk Zwjazkoweho předsydstwa Domowiny. Wšitcy su so k 27. januara z wokrjesneho zarjadnistwa předpołoženemu dokumentej wuprajili. Hač do 15. měrca měješe Domowina składnosć, wokrjesej swoje stejišćo posrědkować. Wone wopřijima w cyłku 20 stron. Předsyda Dawid Statnik je nětko w zdźělence nowinarjow mjez druhim informował, zo „ma so při planowanju kapacitow našich šulow w Budyskim wokrjesu pozitiwne demografiske wuwiće serbskich wsow wobkedźbować“. Wuskutk runostajnych resp. stupacych ličbow dźěći, kotrež šule z wučbu serbšćiny wopytuja, je wosebje spóznajomny na Budyskim Serbskim gymnaziju.
