Prózdninske poskitki w Hornjej Łužicy wulce požadane

Budyšin (SN/bn). Lětnje, často „wulke“ mjenowane prózdniny steja před durjemi. Tójšto hornjołužiskich towarstwow a institucijow wuhotuje šulerkam a šulerjam drje w najrjeńšim času lěta sep mnohostronskich a wotměnjawych zarjadowanjow. A zajim na nich je tónraz snano hišće wjetši hač hewak.

Tak je na přikład „Rěčne prózdninske lěhwo“, kotrež Serbske šulske towarstwo wot 7. do 16. awgusta we Wodowych Hendrichecach organizuje dospołnje wuknihowane. Tež zhromadny prózdninski poskitk Smjerdźečanskeho kubłanskeho centruma LIPA a SŠT je z ně­hdźe 30 wobdźělnikami połnje wućeženy. Wot 23. do 27. awgusta budu dźěći w starobje šěsć do dźesać lět po skupinkach, nawjedowanych wot dohromady šěsć pomocnicow-šulerkow Serbskeho gymnazija Budyšin mjez druhim zhromadnje spěwać, sportować, pućować a warić. Wosebite ćežišćo w tym zwisku je lětsa „strowe zežiwjenje“.