Z projektowymaj dnjomaj za serbskich a serbsku rěč wuknjacych šulerjow je Rěčny centrum WITAJ wčera a dźensa w Čornochołmčanskim Krabatowym młynje 20. róčnicu wobstaća swjećił.

Čorny Chołmc (SiR/SN). Składnostnje wosebiteho jubileja njemóhło žanoho žiwe­ho wotbłyšćowanja zašłosće, přitomnosće a přichoda za misiju rěčneho centruma być. Wobrazna a awtentiska refleksija, kotraž hižo docpěte wuspěchi a předstejace nadawki symbolizuje a wožiwja. Jedne bě na woběmaj dnjomaj spěšnje wočiwidnje: Holcy a hólcy serbsku rěč rady wuknu.

Socialny dźěłaćer RCW Lorenc Jankowsky přisłuša tym ludźom, kotřiž hakle jako­ dorosćeni za wučbu serbšćiny na šulskej ławce sedźachu. Čehodla? „Přez mandźelsku, kotraž serbuje, sym so započał za rěč zajimować. Nimo toho je wažne serbsku rěč zachować a dale po­srědkować, dokelž je wona dźěl našich swójskich stawiznow a identity. Jako kultura ma samsnu hódnotu kaž druhe.“