Towarstwo prosy wo podpěru

pjatk, 25. nowembera 2022
artikl hódnoćić
(0 )

Drježdźany (SN). Čłonojo a čłonki towarstwa „Stup dale“ wojuja tučasnje wo zachowanje Serbskeje dźěćaceje dnjoweje skupiny w Drježdźanach. Wo tym informuje čłon towarstwa Christoph Cyž. Krótkodobnje je nošer pěstowarnje wotskočił. Z pomocu crowdfundingoweje ­akcije hromadźi towarstwo „Stup dale“ pjenjezy, z kotrymiž měła so w přichodźe podruž pěstowarnje financować. „Wotmysł je, přichodnemu nošerjej dźěl pjenježnych winowatosćow wotewzać. Tak njewobsteji riziko, zo měł měsac wob měsac ze swójskeje móšnje pěstowarnju podpěrać, ale jeničce z pomocu finan­cielnych srědkow města Drježdźany“, Christoph Cyž rozłoži.

Tučasnje wjedu rozmołwy z móžnym nošerjom, kiž chce přichodny tydźeń dalši wažny rozsud w tutym prašenju tworić. Tohodla chcedźa hač do kónca tydźenja najwjetši dźěl planowaneje sumy 10 000 eurow nazběrane měć. To měł jasny pozitiwny signal być, zo so w Drježdźanach něšto hiba a zo so „Stup dale“ prócuje, financnu situaciju pěstowarnje polěpšić a přichodneho nošerja z tym wolóžić. Štóž chce akciju towarstwa podpěrać, móže to přez slědowacy link činić: .

wozjewjene w: Łužica
Prošu přizjewće so, chceće-li komentar podać

Serbska debata

nowostki LND