Annaberg-Buchholz/Budyšin (dpa/SN/BŠe). Tež hdyž sněh a zyma přećelam zymskeho sporta wokomiknje wjeselo wobradźitej, Sakscy turistikarjo pytaja přiwšěm za alternatiwami, kak móhli ­ludźi w zymje zabawjeć, jelizo sněh na horach pobrachuje.

Najwjace dowolnikow na centralnych zymskich sportowych městnach Sakskeje – kołowokoło Šmrěčnika a we wuchodnych Rudnych horinach – přeja sej klasiske zymske aktiwity, kaž sněhakowanje abo sankowanje. „Tole pak njemóžemy planować, wšako smy wot sněha wotwisni. Zo móhli so šěroko nastajić a na najwšelakoriše wjedrowe wobstejnosće reagować, dyrbimy alternatiwne poskitki wuwiwać a z nimi wabić“, zwurazni Claudia Brödner z turistiskeho zwjazka Rudne horiny w Annabergu-Buchholzu.