Zarjadowanje Astrocentruma w Konjecach překwapjenki přinjesło

Konjecy (JK/SN). Zo so w Delanach mnohe tradicije haja, kóždy wě. Jedna z nich je spěwanje a wčera je so dalša přidružiła. Na hižo třećim zarjadowanju wědomostnikow Astrocentruma Łužica (DZA) w Konjecach rjekny załoženski direktor DZA, profesor Günther Hasinger, zo hodźi so po tajkim rjedźe zetkanjow wědomostnikow z wobydlerjemi a zajimcami při zabawje a grilowanju hižo wo tradiciji rěčeć. Woni chcedźa z tutymi zetkanjemi pokročować. Z tym wupraji to, štož sprawnje zajimowanym přitomnym na wutrobje ležeše: Skrućenje a dalewjedźenje dobrych poćahow mjez wědomosću a wobydlerjemi skrućić a dale wjesć. Po witanju profesora Hasingera předstaji jeho kolega, profesor Christian Stegmann, tuchwilny staw přihotow za załoženje DZA a wuhlady resp. perspektiwy přichodneho wuwića DZA w Delanach.