Wojerowčenjo chcedźa z nowym zarjadowanjom nazymu witać
Wojerecy (SiR/SN). Oktoberski swjedźeń loni wšak je rjana ideja była, tola Wojerecy njeleža w Baworskej a ludźo we Łužicy maja swójske, serbske nałožki a tradicije. Njemóhli w oktobrje potajkim swjedźeń woswjećić, kotryž korjeni w regionalnej tradiciji, na př. w domchowance? To so někotryžkuli Wojerowčan prašeše ... Marketingowe towarstwo region za swójby HOY a zamołwići Wojerowskeho Łužiskeho centruma su tute přemyslowanja dale wuwili. W kooperaciji z Towarstwom za pěstowanje regionalneje kultury w srjedźnej Łužicy, Wojerowskej župu Domowiny a dalšimi partnerami, chcedźa lětsa 4. oktobra domchowanku wosebiteho razu – „reje na domchowanku“ – organizować.
