Na pólskim boku Wjercha Pückleroweho parka swjedźeń jabłučinow woswjećili

Łęknica (JoS/SN). W susodstwje Mužakowa, w namjeznym městačku Łęknica, kotrež hornjoserbsce Wjeska rěka, su kónc tydźenja w pólskim dźělu Wjercha Pückle­roweho parka swjedźeń jabłučinow wo­swjećili. Lětuše wjedrjo wšak jabłučinam wosebje tyło njeje. Pózdni zmjerzk w nalěću je wjele kćenjow zničił, tak zo maja w parku lětsa słabe žně. „To tu hišće ženje dožiwiła njejsym, w cyłych swojich 25 lětach skutkowanja nic“, powěda direktorka pólskeho dźěla parka Barbara Iwlew.

Organizatorojo su so najebać dešćojteho a dosć zymneho wjedra wo derjeměće wopytowarjow postarali. Tak přewjedźechu na přikład klasiski koncert, dźěłarničku za pomolowanje škleńcy abo lěhwowy woheń, při kotrymž pječene jabłuka abo běrny z pjecy předawachu. Pólske turistiske towarstwo informowaše wo najnowšich poskitkach, tež domoródny pčołar tu swoje produkty předstaji.