Kóžde lěto w meji přeprošuje město Kamjenc na swój kćenjowy běh wokoło a na Pastwinu horu. Tak bě tež lětsa za kóždeho wutrajnostneho sportowca něšto pódla – pak móžeše so na třoch běhanskich čarach mjez 1 a 15 km wubědźować, pak na horatej kolesowanskej čarje přez 50 abo 80 km z tamnymi napřemo honić, pak samo woboje kombinować a so w duatlonje wuspytać. A dokelž je so lětsa tež wjedro wot swojeje najlěpšeje strony pokazało, smědźachu zarjadowarjo z tójšto wobdźělnikami ličić.