Hosćo 40lětne dźěło wučerjow kaž šulerjow wulce připóznali
Ralbicy (aha/SN). Wjele chwalobnych słowow, zwjazanych z dźakom a připóznaćom, bě pjatk na poradźenym zarjadowanju składnostnje 40lětneho wobstaća nowotwara Ralbičanskeje šule a zjawneho wotewrjenja wobnowjeneho kubłanišća słyšeć. Wosebje płaćachu wone wučerjam – bywšim a nětčišim – za kubłanske dźěło kaž tež šulerjam zakładneje a wyšeje šule, kotřiž na zazběhu swjedźenja z programom na so skedźbnichu a něhdźe 400 hosći zawjeselichu. Šulerki 4. lětnika běchu katolsku narodnu drastu zwoblečene. Tak zarejwa 16 porow „Šewca“ a „Katyržinku“ wokoło meje. Damian Matik z Łazka bu na to mejski kral a wuzwoli sej Wiktoriju Langec z Koćiny za kralownu.