Prof. Wornar kritizuje rozsudy Załožby za serbski lud
Lipsk (SN/CoR). Wot lěta 1996 rozdawa Załožba za serbski lud lětnje hač do tři stipendije zajimcam z wuchodoeuropskeho wukraja za dwusemesterski studij sorabistiki na Lipšćanskej uniwersiće. Dotal su na te wašnje dohromady 46 stipendiatow spěchowali. Ani loni ani lětsa pak njejsu stipendij wupłaćili. Direktor Lipšćanskeho Instituta za sorabistiku prof. dr. Edward Wornar to njerozumi: „Loni kaž tež lětsa smy ludźi z poručenskim pismom k załožbje pósłali, zo bychu so wo stipendij starali. Jedna so tu wo ludźi, kotřiž su so na lětnjej šuli wobdźělili abo su we wobłuku někajkeho projekta ze serbšćinu dźěłali. W kóždym jednotliwym padźe je jim załožba zdźěliła, zo jich z formalnych přičin wotpokaza, dokelž ze słowjanskeho kraja njepochadźeja abo slawistiku njestuduja.“