Štóž chce w dźěłowym swěće našeho časa postupować, dyrbi so dale a bóle wukmanjeć. Wosebje w rjemjeslniskich powołanjach wotwěra přidatna kwali­fikacija wrota do wuspěšneho dźěła.

Lubij (SN/JK). W Lubijskim powołanskošulskim srjedźišću je wčera Křesćan Grutka z Chrósćic projekt k zakónčenju dwulětneho wukubłanja na wysokotwarskeho technikarja wuspěšnje zakitował. Projekt „Přetwar a saněrowanje bydlenskeho domu“ předstaji wón w serbskim přednošku pruwowanskej komisiji, wučerjam a sobušulerjam. Z pomocu prezentacije zmóžni Chróšćan němskim hosćom­ sćěhować přednošk, nakopjeny ze serbskimi wobrotami z twarskeho wobłu­ka, štož činješe wěsće a přeswěd­čiwje. Na naslědne prašenja k projektej je wěsće wotmołwił, dopokazujo tak wobšěrnje přiswojenu fachowu wědu.