Braniborske ministerstwo předźěłane podłožki wospjet pruwuje
Choćebuz (SN/MiR). Ewaluacija wučby serbšćiny w Delnjej Łužicy móhła so přichodne tydźenje zahajić. Tole přeja sej wědomostnicy z Instituta za sorabistiku Lipšćanskeje uniwersity, kotřiž su ju přihotowali. Spočatk noweho šulskeho lěta w Braniborskej, w septembru, móhło tak daloko być. „Kónc junija smy braniborskemu ministerstwu za młodźinu, kubłanje a sport předźěłane podłožki přepodali“, rozłožuje jednaćelski direktor instituta a nawoda projekta prof. dr. Edward Wornar. W prěnim namjeće jewjachu so prašenja na probandow, kotrež nimaja so wšelakich prawniskich předpisow dla zapřijeć. Ministerstwo njebě z nim tuž cyle spokojom a dokumenty wospjet pruwuje. Rěč je samo wo tym, zo eksterny pruwowar to w nadawku ministerstwa čini. Hakle potom chcedźa zahajenju wědomostneho hódnoćenja serbskeje wučby přizwolić.