Čiły zajim turistow za delnjoserbšćinu

štwórtk, 23. julija 2015
artikl hódnoćić
(0 )
Zajimawe přednoški a ekskursije tworja wobdźělnikam tuchwilneho rěčneho kursa w Choćebuzu dobry zakład za nawuknjenje delnjoserbšćiny.  Foto: Birgit Naglowa Zajimawe přednoški a ekskursije tworja wobdźělnikam tuchwilneho rěčneho kursa w Choćebuzu dobry zakład za nawuknjenje delnjoserbšćiny. Foto: Birgit Naglowa

Choćebuz (SN/MiR). Na kursu delnjoserbšćiny, kotryž wotměwa so hač do njedźele na Choćebuskej Šuli za delnjoserbsku rěč a kulturu, wobdźěla so 34 zajimcow z Braniborskeje, Berlina, Sak­skeje, Pólskeje a Čěskeje. Jako docenća skutkuja tam Angela Šurmanowa, Franciska Šulcojc, Margot Hašcyna, Marcus Kóńcaŕ a Erwin Hanuš. Hižo zańdźenu njedźelu připosłuchachu wobdźělnicy w tamnišim Serbskim muzeju awtorej Jurjej Kochej. Wobhladali su sej tež wustajeńcu słowjenskeho wuměłca Karla Vouka a serbskeho molerja Jana Buka. Mjeztym zwučujetej skupinje započatkarjow a pokročenych kaž tež rozmołwny kurs, na cyle praktiskich přikładach rěč nałožować. „Program wopřijima ekskursije kaž tež přednoški wo stawiznach, wo narodnej drasće, přirodźe a načasnych temach. Při tym je stajnje tež składnosć, so z maćernorěčnymi ludźimi rozmołwjeć. Mam za wažne, zo so wobdźělnicy na mnohich runinach z Delnjej Łužicu zaběraja, hdźež su serbska rěč a tradicije žiwe“, rozłožuje nawodnica kubłanišća Marja Elikowska-Winklerowa.

wozjewjene w: Kubłanje
Prošu přizjewće so, chceće-li komentar podać

nawěšk

nowostki LND