Chrósćicy/Malešecy (SN/MiR). Kubłarki a kubłarjo w pěstowarnjach a hortach Serbskeho šulskeho towarstwa so tež w prózdninskim času wo swojich chowancow staraja. „Naše zarjadnišća su wšědnje wotewrjene. Zdobom pak zaručamy našim sobudźěłaćerjam znajmjeńša dwutydźenski dowol“, wuswětla sobudźěłaćerka SŠT Marlis Młynkowa. Dźěćace dnjowe přebywanišća Chrósćicy, Ralbicy, Wotrow a Malešecy kaž tež Němčanska pěstowarnja su za čas prózdnin dwě njedźeli zawrjene. Tuchwilu stej to Ralbičanske a Wotrowske. Dźěći pak móža druhu pěstowarnju abo hort, kotrež su w nošerstwje SŠT, wopytać, nimaja-li starši za nje składnosć, w tym času doma přebywać. Dźěći wot druhdźe tuchwilu w Chrósćicach njezastaruja. „Kubłarjo kaž tež starši wědźa stajnje hižo kónc lěta, hdy na druhe lěto dowol planujemy“, Marlis Młynkowa rozłožuje, „druhdy so starši hišće jónu naprašuja. Problemy pak žane nimamy.“