Prózdninske lěhwo SŠT nochce nichtó parować
Wodowe Hendricheccy (SN/MiR). Z trjenjemi na ramjenjomaj steja prózdninarjo před swojim kwartěrom we wočerstwjenišću Querxenland. 32 dźěći a młodostnych, wosom holcow a 24 hólcow ze serbskich šulow a gymnazija wužiwa lětuši poskitk Serbskeho šulskeho towarstwa a so we Wodowych Hendrichecach wočerstwja. Hnydom skoča woni do chłódneje wody w susodnej kupjeli, štož je tež trjeba. Wšako su so dopołdnja a připołdnju při wulkej horcoće z fotografiju zaběrali. Matej Dźisławk je jim zbližił, zo čłowječe wóčko motiwy cyle hinak widźi, hač to fokus kamery zamóže. Zdobom je jim na přikładach z interneta pokazał, z kotrymi srědkami fachowc fotografowane motiwy atraktiwniše sčini abo změni. „Dobra to ideja SŠT, přidatne poskitki do programa zapřijeć. Mi dźe wo to, za wšelake medije sensibilizować, w tym padźe za fotografiju“, rjekny Matej Dźisławk. Nawječor mějachu wšitcy wjeselo při dźiwadźelenju z Měrkom Brankačkom. Wón je z prózdninarjemi wšelake sceny improwizował.
