Naćisk zakonja wo dalewuwiću šulstwa w Swobodnym staće Sakskej mjeztym něšto dnjow předleži. Nětko započina so dźěło na zjawnej runinje, to rěka, zo móža wšitcy zastupjerjo zajimow swoje stejišćo k naćiskej zapodać.

Budyšin (SN/MiR). Nastupajo serbske naležnosće, kotrež so w dotalnym sakskim šulskim zakonju jewja, njejsu w aktualnym naćisku žane změny. Tak paragraf 2 garantuje, zo móža wšitke dźěći a młodostni w serbskim sydlenskim rumje, kotrychž starši to chcedźa, we wšelakich předmjetach a lětnikach serbšćinu wuknyć. Přiwšěm budu zastupjerjo zajimow Serbow swoje stejišćo ministerstwu po­srědkować. „Su-li w zakonju z widom na serbske naležnosće změny trěbne, měli to zwjazki a towarstwa nětko rjec. Wšako je zakoń zakład postajenjow w ministerstwje. Je tuž wažne, tele temy tež nětko rozjimać. Wjeselimy so na namjety ze serbskeho wobłuka“, rozłožuje kubłanskopolitiska rěčnica frakcije SPD w Sak­skim­ krajnym sejmje Sabine Friedel.