Projekt ze Serbskim muzejom předstajeny

Budyšin (SN/ap). Stawizny Budyskeho Serbskeho muzeja z pomocu architektury přeslědźić je zaměr młodźinskeho projekta „Swědki stawiznow“. Marina Ewert kaž tež Michael a Konstantin Jemeljanow z projektneho teama su mysl zrodźili a ju wčera zajimcam w muzeju předstajili. Projektna nawodnica organizacije Němska młodźina w Europje (djo) Olena Vasyuk jich podpěrowaše. „Nochcemy wučerjo być, ale sej wědu z wami zhromadnje nadźěłać“, praji koordinatorka Kamjenskeho zetkawanskeho domu Marina Ewert. Nošer předewzaća je Sakski krajny zwjazk djo we wobłuku programa „Dźěło młodźinskich zwjazkow za wšitkich“, kotryž zasadźa so za mjezykulturne­ skutkowanje młodych ludźi. Spěchować budźe je zwjazkowe ministerstwo­ za swójby, seniorow, žony a młodźinu.