Wodowe Hendrichecy (SN/MiR). Dźesać šulerjow šesteho lětnika přija lětsa na 50. centralnej olympiadźe serbšćiny predikat „z wuznamjenjenjom“. Maksimilian Gruber, Jadwiga Šurec a Aaron Bjeńš su šulerjo Budyskeho Serbskeho gymnazija a třo maćernorěčni wobdźělnicy z najwyšim predikatom. Mjez najlěpšimi su tež třo šulerjo z Delnjeje Łužicy a stajnje dwajo, kotřiž serbsce jako cuzu rěč resp. druhu rěč na swojej šuli wuknu. Na wu-znamjenjenju dźensa dopołdnja we Wodowych Hendrichecach rjekny Ludmila Budarjowa, předsydka Serbskeho šulskeho towarstwa, kotrež je mjeztym 25 lět nošer tohole wubědźowanja: „Tale olympiada budźe tež přichodnje hódne zarjadowanje. Wšako móžeće so tule mjezsobu zetkać, wubědźować, serbsce rěčeć, jedyn druheho rozumić a něštožkuli štož dotal móhli njejsće, dohonić.“ Kóždemu wobdźělnikej, kaž tež přitomnym wučerjam a studentam přepoda wona k składnosći jubileja zdźěłanu brošurku.