Berlin (dpa/SN). Wustawoškit chce so Alternatiwje za Němsku (AfD) přichodnje bóle wěnować, hač bě to dotal činił. Zarjad je stronu jako cyłk nětko jako „pad za pruwowanje“ a jeje prawicarskonarodne „křidło“ kaž tež jeje dorostowu organizaciju JA samo jako „podhladny pad“ zastopnjował, kaž powěsćernja dpa wčera zhoni.
Strona móže so z „pruwowanskim padom“ stać, maja-li zamołwići někajke pokazki na ekstremistiske prócowanja. W tym padźe pak njeje wobkedźbowanje z pomocu tajnych informantow abo tajneje słužby zasadnje dowolene.
Porno tomu je nastupajo „podhladny pad“, kaž nětko hladajo na „křidło“ wokoło durinskeho stronskeho a frakciskeho šefa AfD Björna Höckeho, móžno tajnosłužbne srědki zasadźić, byrnjež jenož w jara wobmjezowanej měrje. Tak smědźa podhladnych wobkedźbować abo sej informacije na zarjadach wobstarać. Tajnych informantow njesmědźa přeco hišće zasadźić. Tež kontrola telekomunikacije njeje dowolena. To je jenož móžno, maja-li organizaciju abo stronu za „objekt wobkedźbowanja“.