Spěchowanske srědki za to w dwójnym etaće přewostajić

Smochćicy (SN/MiR). Kubłanje doro­sćenych ma so bóle spěchować. Tele žada­nje wujewi so wčera wjackróć na dalekubłanskim forumje Sakskeje „Žiwjenjahódny kraj – dalekubłanje na wsy“ w Smochčanskim Domje biskopa Bena.

Předsyda sakskeje přirady za kubłanje dorosćenych Karl-Heinz Maischner rje­kny: „Dalekubłanje je wažny dźěl komunalneho wuwića.“ Kaž mnozy dalši rěčnicy skedźbni wón na bohatosć wjesneho žiwjenja. „Mamy tam zbudźić lóšt ludźi na to, so kubłać. Tež hdyž mamy mnohich akterow na tutym polu, njeje so poradźiło politiku k tomu pohnuć, financny podźěl za tute dźěło w dwójnym etaće 2015/2016 signifikantnje powjetšić.“