We Worklecach rumnosće hižo njedosahaja

Worklecy (SN/MiR). Do Worklečanskeho dnjoweho přebywanišća „K wódnemu mužej“ chodźi 60 pěstowarskich a 20 žłobikowych dźěći. Dalše, kotrež w nošer­stwje gmejny zastaruja, su hortowe dźěći zakładneje šule „Michał Hórnik“. Tuchwilu maja jich tam w horće 72 šulerjow a k tom­u dweju z podźělnym zastaranskim dojednanjom. „Něhdy mějachmy w horće 38 dźěći. Tuchwilne ličby naše­ rumnostne wuměnjenja přesahuja“, zwěsća Worklečanski wjesnjanosta Franc Brusk (CDU). Nětko maja w šuli štyri hortowe skupiny w štyrjoch rumach. Druhe rjadowniske stwy njehodźa so wužiwać, dokelž trjebaja je za cyłodnjowske poskitki abo wyša šula za podawanje wučby. Tež na druhe městna njemóža wuwinyć, dokelž maja hor­towe dźěći składnosć měć, cyłodnjowske poskitki w šuli wopytać. Hortowe rumnosće słušeja tuž do šule.