Drježdźany (dpa/SN). Pěstowarnje kaž tež zakładne a spěchowanske šule móža so zaso za europski šulski program z dwěmaj porcijomaj čerstweho sadu, zeleniny a mloka wob tydźeń přizjewić. Internetny program přizjewjenja za přichodne šulske lěto je wot dźensnišeho aktiwny, ratarske ministerstwo w Drježdźanach zdźěli. Nimo přidatnych witaminow su programy ze zajimawymi ­pedagogiskimi poskitkami zwjazane, na přikład z wopytom ratarskich zawodow, zdźěla sakski minister za ratarstwo ­Wolfram Günther (Zeleni). Dźěći pospytaja sad, zeleninu a čerstwe mloko a runočasnje zhonja, što k strowemu zežiwjenju słuša a kak žiwidła scyła nastanu.

Doba přizjewjenja traje hišće hač do 16. apryla. Zawody, kotrež su za wopyt dźěći wuzwolene, chcedźa spočatk meje wozjewić. Programowy dźěl „Sad a zelenina“ móža jenož zakładne a spěchowanske šule wužiwać. Programowy dźěl „mloko“ měri so nimo toho na pěstowarnje a žłobiki. Z wobdźělenjom na šulskim programje EU chcedźa strowemu zežiwjenju dźěći polěkować. Swobodny stat přinošuje 600 000 eurow.

Brüssel (dpa/SN). Zwjazkowa ministerka za nutřkowne naležnosće Nancy Faeser je Europski parlament doraznje namołwjała, azylowej reformje, wo kotruž běchu so lěta wadźili, dźensa přihłosować. Předewzaće je zakład rjadowaneje migracije a trajaceje pomocy na dobro komunow, rjekny politikarka SPD nowinarjam. „Europa dyrbi dopokazać, zo je jednanja kmana. Nichtó njesměł tutu temu prawicarskim populistam přewostajić, kotřiž nuzu ludźi za swoju propagandu znje­wužiwaja.“

Faeser warnuje, zo je reforma azyloweho prawa rozsudna za dalewobstaće EU. Wotewrjene mjezy mjez krajemi jenož funguja, su-li wonkowne mjezy zawěsćene, wona rjekny. Po nowym systemje měli kóždeho migranta na wonkownej mjezy EU kontrolować a registrować, ­wona rjekny. Štóž nima prawo trajneho přebywanja w EU, dyrbi so zaso do swojeje domizny nawróćić, sej wona žada.

Parlament EU chcyše dźensa reformu azyla schwalić. Z njej chcedźa migrantow přichodnje do stražowanych lěhwow tyknyć, jich prawo na azyl pruwować a wotpokazanych spěšnje wotsunyć.

„Populistam temy njepřewostajeć“ njeje runjewon najšpatniša myslička. Wěcywustojne, transparentne a wěcownje spo­srědkowane politiske postupowanje je drje najkmańši puć. Nastupajo reformu azyloweho prawa by to rěkało, „argumenty“ škarakow ignorować a wobydlerjam sprawnje rozłožić, zo njeje „migracija mać wšitkich problemow“, ale potencielny motor towaršnostneho wuwića – jeli so wotpowědne naprawy zwoprawdźeja. Tak hodźeli so na přikład pjenjezy, z kotrymiž agentura Frontex w nadawku EU wonkowne mjezy „robustnje“, potajkim z namocu, škita, zawěsće lěpje za programy integracije nałožować. Ludźi w někajkich lěhwach, často pod nječłowjeskimi wuměnjenjemi (Moria! Vučjak!) interněrować płaći wjace, hač jim spěšnje a njehladajo na „status přebywanja“ dowolić, w Europje dźěłać. Sej žadać, „konsekwentnje wotsuwać“, je w tym zwisku slepa hasa. Sej tezy populistow přiswojeć mjenujcy tyje předewšěm: populistam. Bosćan Nawka

Žitawa (dpa/SN). Hišće do lětnjeje přestawki chcedźa rozrisanje namakać, kak móhli wokrjesam a komunam w Sakskej pomhać, kotrež so z dale přiběracymi wudawkami stajnje nowych wužadanjow dla bědźa. Tole je sakski ministerski prezident Michael Kretschmer (CDU) wčera po posedźenju krajneho knježerstwa w Žitawje připowědźił. Komuny a wokrjesy trjebaja solidny zakład, zo móhli swoje etaty zdźěłać, wón rjekny. Tohodla chcedźa wuradźować, w kotrym wobjimje móhł swobodny stat komunalnu runinu dale skrućić, Kretschmer rjekny.