Mnichow (dpa/SN). Palestinski ministerski prezident Mohammed Schtaje je mjezynarodne statowe zhromadźenstwo namołwjał, zdźěłać program za nowonatwar ćežko zničeneho Gazaskeho pasma. „Trjebamy Marshallowy plan za Gazaske pasmo“, rjekny Schtaje powěsćerni dpa na kromje Mnichowskeje wěstotneje konferency. Plan měł tři dźěle wobsahować: Nuzowu pomoc, twar bydlenjow a wožiwjenje hospodarstwa. „Wěmy z wobrazow satelitow, zo je 45 procentow wšeho Gazaskeho pasma zničenych. To rěka 281 000 dospołnje abo zdźěla zničenych bydlenjow.“ Spěšne porjedźenje by hižo w běhu někotrych tydźenjow abo měsacow móžne było. „To rěka, zo trjebamy za to tójšto pjenjez.“ Zhromadnje z UNO tuchwilu přepytuja, kak móhli najwjetšej nuzy wotpomhać, wón rjekny.
Ministerski prezident Israel warnowaše, wojersku ofensiwu rozšěrić a hišće wjace ciwilistow wućěrić. Ludźo trjebaja nuznje dalše pomocne srědki, kaž tež milinu, wodu a bencin. „Wšo tole Israel ze swojim wójskom dotal blokuje.“
Augsburg (dpa/SN). W chětro krizojtej naledźe su dźensa popołdnju štyri dny trajacu hłownu zhromadźiznu Konferency biskopow Němskeje zahajili. Krótko do zahajenja posedźenja w Augsburgu bě so Vatikan přizjewił a němskim sobubratram we wěrje planowane wothłosowanje faktisce zakazał. Biskopja chcychu wo wustawkach synodalneho wuběrka wothłosować. Tutón wuběrk ma Synodalnu radu přihotować, w kotrejž chcedźa zastupnicy cyrkwje zhromadnje z lajkami runoprawnje wothłosować.
Vatikan bě hižo wospjet na to pokazał, zo njeje tajke postupowanje w katolskej cyrkwi předwidźane. Tam rozsudźa po klasiskich předstawach bamž a wot njeho powołani biskopja.
Złotobarbne sportowe črije jako fanowy artikl je bywši prezident USA Donald Trump předstajił. Hač ke kulkam sahace sportowe črije z chorhoju USA a pismikom „T“ za Trumpa maja 370 eurow płaćić. Něhdyši prezident je sej wěsty, zo budźe wabjenska akcija wuspěšna. Wobjim je z tysac porami wobmjezowany. Trump je wospjet fanowe artikle za sebje zhotowić dał. 77lětny chce při prezidentskich wólbach w nowembru znowa nastupić.
Na pasažěrow padace čerwje z wačokoweje polcy lětadła su mašinu ameriskeho lětadłoweho předewzaća Delta Airlines nuzowali, so do Amsterdama nawróćić. Lětadło bě po puću do Detroita w USA a bě hižo nad Jendźelskej, jako po něhdźe hodźinje čerwje z wačokoweho faška na ludźi padachu. Zwěrjatka běchu sej z toboły ze skaženej rybu wulězli. Mašinu dyrbjachu najprjedy raz wurjedźić.
Braunschweig (dpa/SN). Zahajenje procesa přećiwo podhladnemu Němcej pjeć seksualnych njeskutkow dla je so dźensa rano w Braunschweigu přestorčiło. Nawal před krajnym sudnistwom bě tak wulki, zo njemóžachu proces kaž planowane zahajić. 47 lět staremu Christianej B. wumjetuje statne rěčnistwo tři ćežke wumocowanja a seksualne znjewužiwanje dźěći w Portugalskej. Předewšěm pad w zwisku ze zhubjenej Maddie pochadźaceje z Jendźelskeje mjezynarodnje wulku kedźbnosć zbudźi.
Chce stronu jutře załožić
Berlin (dpa/SN). Bywši prezident wustawoškita Hans-Georg Maaßen chce jutře w Bonnje stronu „Uniju hódnotow“ załožić. Na zetkanju z přiwisnikami chce wón tohorunja wustawki a program wobzamknyć, zdźěli Maaßen wčera w Berlinje. Nowa strona ma so na prawym boku politiskeho spektruma zaměstnić. Hižo wjacore lěta wobstejace towarstwo „Werteunion“ je jara konserwatiwne a něhdy CDU-bliske zjednoćenstwo z někotrymi tysacami čłonami.
Nowe wěstotne zrěčenje
Oslo (dpa/SN). Norwegscy wojacy chcedźa wot nalěća ukrainskich wojakow za zasadźenja z małymi čołmami trenować. To je zakitowanske ministerstwo Norwegskeje wčera zdźěliło. Zdobom chce Norwegska Ukrainje gumijowe čołmy a trěbne wuhotowanje w hódnoće dobrych pjeć milionow eurow darić. „We wobłuku wukubłanja póńdźe mjez druhim wo překročenje rěkow a operowanja w pobrjóžnych kónčinach“, rjekny norwegski zakitowanski minister Bjørn Arild Gram rozhłosowemu sćelakej NRK. Trening ma so po informacijach mjenowaneho ministerstwa w Nižozemskej zahajić. To je prěni krok maritimneje kooperacije, kotruž Norwegska a Wulka Britaniska nawjedujetej. Norwegska přinošuje tu ze swojej maritimnej kompetencu a nowymi technologiskimi rozrisanjemi.