26. jěchanski a skakanski turněr w Hórkach přewjedli

Zamołwići Konjaceho sportoweho towarstwa Při Klóšterskej wodźe Pančicy-Kukow su prawje ličili a nowinarjam zdźělili, zo je dokładnje 143 wobdźělnikow z eksaktnje 219 konjemi minjeny kónc tydźenja 496 razow w Hórkach respektiwnje w Hrańcy startowało. Na hranicy mjez Delanami a Horjanami je so njedźelu dopołdnja na přikład Worklečanka Antje Bobcyna zhromadnje ze sudnikom Dieterom Grafom wo prawy startowy wotběh wobdźělnikow sakskich mišterstwow w mnohostronskim jěchanju starała, jako přewjedźechu při dejnym kombinaće přezpólny parcours. K zadźiwanju někotrych swěrnych při­hladowarjow běchu zamołwići mjenujcy slěd disciplinow změnili a skakanje na druhe městno přepołožili. „Klasiski wotběh mnohostronskeho jěchanja je poprawom dresura – přezpólne jěchanje – skakanje. Je pak tež móžno druhu a třeću disciplinu­ wuměnić. Smy to tak wupisali, dokelž so do našeho wotběha lěpje hodźi“, rjekny jenički starter na krajnych mišterstwach Křesćan Zahrodnik z Chrósćic.

TSV Wachau – Sokoł Ralbicy/Hórki 1:2 (1:0)

Zestawa hosći: Schöne – K. Matka, Schultz, Wałda, Lešawa (46. Domaška), Šewc, Rawš, Gloxyn, Korjeńk, M. Matka (89. Šiman), Kurjat

Koparjo Sokoła Ralbicy/Hórki poda­chu so minjenu sobotu jako faworit k postupnikej do Wachauwa. Hra bě wot spočatka do kónca wurunana a tak nasta prawy fight wot prěnjeje do poslednjeje mjeńšiny. Trenarjej Chrystofej Gloxynej znowa někotři hrajerjo pobrachowachu, ale wulkeho kadra dla to jara njenapadny. Delanscy bulkoparjo njenamakachu prawje do hry, jenički nadběhowar Gabriel Kurjat bě prědku kaž zhubjeny a tak dósta jenož mało bulow. Hrajerjo z Wachauwa spytachu Sokołow z měnjatym pressingom mjerzać a tak dyrbjachu hižo po 20 mjeńšinach prěnje wrota dnja přijimać, jako po rjanej kombinaciji domjacy Marlon Fischer mudrje přetwori. Tež Sokoljo mějachu w prěnim połčasu hišće dwě dobrej składnosći, tola wobě njeń­dźeštej do wrotow.