Sport (19.01.18)
Na 15. bulowu nóc
Sportowe towarstwo Natwar Němske Pazlicy přeproša na 15. bulowu nóc z koparjemi, kotřiž su starši hač 35 lět. Turněr přewjedu Němskopazličenjo dźensa wot 18.45 hodź. w sportowni při Kamjenskim lětanišću. Mjez dźesać cyłkami je prěni raz mustwo z Barta. Dale hraja Statistika Němske Pazlicy, Natwar Němske Pazlicy I a II, Přećelski kruh Natwar Němske Pazlicy, Lok Kamjenc/Natwar Němske Pazlicy, ST Marijina hwězda, SJ Njebjelčicy, Jednota Kamjenc, ST Běła/Cunnersdorf. Titul zakituje prěnje zastupnistwo Natwara Němske Pazlicy. Kónčnu hru změja wo połnocy.
Kopańca – regionalna liga muži
27.01. 15:00 ZFC Meuselwitz –
1. FC Lokomotiwa Lipsk
28.01. 13:30 Chemija Lipsk –
Energija Choćebuz
Testowe koparske hry
19.01. 19:00 Natwar Němske Pazlicy –
Sokoł Ralbicy/Hórki
20.01. 11:00 Budissa Budyšin –
Jednota Kamjenc
20.01. 13:30 Módro-běli Kulow –
ST Horni kraj-Sprjewja
21.01. 13:30 SJ Njebjelčicy –
SG Großnaundorf
27.01. 11:00 Budissa Budyšin –
FC Hornja Łužica
Neugersdorf
Běhi w hali
Najmłódši blidotenistrjek hry był
Do druheje połserije startowaše načolnik prěnjeje blidotenisoweje wokrjesneje ligi DJK Konjecy přećiwo TTC 97 Kamjencej. Domjacy nastupichu k partiji z měšanymi začućemi. Sprěnja wupadny z Michałom Elstnerom, kiž je tuchwilu we wuběrnej formje, wažny hrajer. Zdruha dźěše Maćij Kokla, kiž ma problemy z kolenom, trochu zranjeny do hry.
Dwójki běžachu optimalnje. Maćij Kokla a Alojs Čóška kaž tež Pětr Bejma a Dierk Šewc wopušćichu zelene blido jako dobyćerjo. André Čórlich a Julian Hrjehor dypk wotedaštaj. Po prěnim kole jednotliwcow nawjedowachu Konječenjo přez dobyća Šewca, Čóški, Čórlicha a Bejmy njewočakowano ze 6:3.
Klóšterscy wolejbulisća spokojom
Cil sezony, prěnje abo druhe městno docpěć, drje so wolejbulistam ST Marijineje hwězdy njeporadźi, ze šěsć dobyćemi z dźesać hrow pak móža woni dosć spokojom być. Zady wotlěwa su to Norbert Wahlicht, Franz Piller, Metod Šołta, Marko Kowar (trenar), Jörg Reimann, Jakub Langa, Pětr Bobka, Marko Smoła a Enrico Kral; prědku wotlěwa Benedikt Smoła (kapitan), Pedro Libš, Jurij Bjeńš a Tobias Retzela. Na wobrazu pobrachuja Gerald Bachmann, Lukas Kubic a Beno Šołta.
Foto: Benedikt Smoła
Kehelerjo słaby wukon pokazali
Słaby wukon pokazachu kehelerjo Sokoła Ralbicy/Hórki na domjacych čarach w Rakecach přećiwo KSV 47 Wojerecam. Jako prěnjej dyrbještaj Gisbert Šiman a Michał Mark na čaru. Šiman móžeše ze 400 nakulanymi kehelemi hišće spokojom być. Mark pak wosta z 361 kehelemi daloko pod swojimi móžnosćemi. Tež přećiwnikaj žane štomy njezwutorhaštaj, ale předskok 14 drjewow so jimaj přiwšěm poradźi. Roberto Wjenk (359) a Handrij Hejduška (362) měještaj tohorunja swoju lubu nuzu a wostaštaj daloko pod wočakowanjemi. Wosebje stary zajac Hejduška njebě ze sobu spokojom. Kontrahentaj běštaj wo 55 kehelow lěpšej, tak zo dźěchu hosćo z předskokom 69 drjewow do třećeho koła. Jurij Šiman docpě z 397 kehelemi dosć dobry wuslědk, Tobias Mikławšk ze 437 połnje přeswědči. Jeju přećiwnikaj pak nakulaštaj 14 kehelow wjace, tak zo Sokoljo z rozdźělom minus 83 drjewami přěhrachu.
Njetrjebawša to poražka. Přihladowarjo mějachu zaćišć, zo je domjacym hišće hodowna pječeń w šiji tči. Ze 6:8 dypkami steja kehelerjo Sokoła na předposlednim městnje tabulki. Franc Nowak
Njewočakowany dobyćer
Koparske mustwo Sportoweho towarstwa Horni kraj-Sprjewja, kotrež hraje w krajnej klasy, je swój titul na 6. S-mobil-cupje w Kamjencu zakitowało.
Před něhdźe 300 přihladowarjemi w sportowni při Kamjenskim lětanišću, mjez nimi tójšto Serbow, překwapi cyłk znowa wšitkich faworitow a so suwerenje přesadźi. Halowy turněr, na kotrymž so wosom koparskich mustwow wobdźěli, wotmě so tradicionalnje dźeń po Budyskim Landskron-cupje. Tón bě lětsa Jednota Kamjenc dobyła. Tež na swójskim turněrje pokazachu chowancy trenarja Franka Ričela dobry wukon a zawěsćichu sej 3. městno. Mjez nimi bě hrajer Serbskeje koparskeje wubranki Patrik Woko. Rodźeny Šunowčan je so w běhu 1. połserije 2017/2018 k stajnemu hrajerjej Jednoty we wyšej lize wuwił.
Kicker we Wotrowje
Na halowu kopańcu we Worklecach
Ralbičenjo nowi Jendźelčenjo – Kulowčenjo piwowy cup dobyli
Na tradicionalny halowy turněr Kulowskeje piwarnje běchu sej koparjo z karnewaloweho městačka šěsć mustwow přeprosyli a dwaj cyłkaj sami stajili. Hrali su w dwěmaj staflomaj, w kotrymajž kwalifikowaštej so stajnje prěni a druhi za połfinale. Hrajny čas wučinješe dwanaće mjeńšin.
W stafli I kopaše prěnja garnitura Módro-běłych Kulow. Wona wšitke partije doby. Jako druhi zaćahny do semifinala Jednota Wojerecy. K zadźiwanju přihladowarjow bu zakitowar pokala z Grodka jenož posledni.
W stafli II hrajachu Ralbičenjo hnydom přećiwo Kulowskej rezerwje a dobychu přez wrota Handrija Jakubaša a Thomasa Schulza z 2:0. W druhej hrě Sokoła přećiwo Großröhrsdorfej přećiwnik nawjedowaše. Ralbičanam pak nochcychu so wrota poradźić. Samo wrotarja woni wuměnichu, skónčnje pak 0:2 podležachu. Tak rěkaše, třeći duel přećiwo sylnemu cyłkej z Weixdorfa dobyć, štož so přez wrota Jakubaša poradźi.
Hrajna scena z halowych wokrjesnych mišterstwow minjenu sobotu mjez ...
Dobyli drje žanu hru njejsu – wrotar wubranki pak najlěpši był
Po swojej premjerje loni w juliju z hru přećiwo Serbskej koparskej wubrance z Hornjeje Łužicy je so nowozałožene delnjołužiske mustwo Serbske koparje nětko druhi raz zjawnosći předstajiło. Přeprošene bě wone minjenu sobotu na 25. halowy koparski turněr wo Brunicowy cup we Łužiskej arenje w Choćebuzu. Tam wubědźowaše so z najlěpšimi cyłkami krajneje ligi a klasy w Choćebuskej kónčinje. Dźesać mustwow wojowaše w dwěmaj staflomaj wo dypki a dobyće. Serbscy koparjo z Depska, Drjenowa, Dešna, Brjazyny a z Bórkowow, mjez nimi šulerjej Delnjoserbskeho gymnazija, su mócnje wojowali. Su pak cyłkam VfB Choćebuz (1:3), Gołkojce (1:3) a Grodk (3:4) přiwšěm podleželi. Přećiwo Bórkowam docpěchu njerozsudne 1:1. Najebać to dóstachu sympatiju a podpěru publikuma. A Dennisa Schrötera z Dešna počesćichu jako najlěpšeho wrotarja turněra, kotryž bě towarstwo Frischauf Brjazyna organizowało. Wone je z wjace hač 220 čłonami jedne z najwjetšich sportowych zjednoćenstwow w Choćebuskej kónčinje.
