Serbšćinarjo gymnazija z překwapjenku
Na Wojerowskim Lessingowym gymnaziju předstajichu serbšćinarjo 5. a 6. lětnika posledni šulski dźeń lěta wosebity program. Na kubłanišću je serbšćina kruty wobstatk wučby.
Skutkuje na dobro druhich
Na zazběhu třidnjowskeho zetkanja młodych swójbow a jich dźěći, kotrež Serbske kubłanske srjedźišćo LIPA kóžde lěto w Smochčanskim Domje biskopa Bena w adwentnym času přewjeduje, słyšeše něhdźe dwaceći maćerjow a nanow přednošk „Nabožne žiwjenje w swójbach hajić skruća swěru a narodny rjap“. Z putacym a retorisce derje přednjesenym wobsahom, překisanym z mnohimi přikładami z praksy, zamó serbska cyrkwinska referentka z wuprajenjemi kaž „Tu smy nastupajo kubłanje na prawym puću“, zajim mjez wobdźělnikami budźić. Přednošowarka Weronika Wróblowa bydli w Pančicach-Kukowje. Narodźiła je so Weithazec swójbje w Chrósćicach. Po wopyće tamnišeje zakładneje šule chodźeše na Kamjenski hospodarski gymnazij, hdźež je w lěće 2001 wuspěšnje maturowała. Na to nastupi dźesaćsemesterski studij teologije w Erfurće. Tomu přizamkny studij jako diplomowa teologowka w Freiburgu, kotryž je tohorunja wuspěšnje zakónčiła. Wot 2007 je wona pjeć lět jako referentka za dekanatnu młodźinu we Worklečanskim Don Boskowym domje dźěłała.
Kulowscy šulerjo muzej wopytali
Kóždu knihu wón dočita
Jonas Kampa z Łaza certifikat „knižneho lěća“ dóstał
Justus, Peter a Bob rady hódančka hódaja. Wćipnosć ćěri jich do nowych dyrdomdejow. Za komisara Reynoldsa woni wosebje łoskoćiwe pady rozrisaja. Tón mjenuje wušiknych hólcow swoju tajnu specielnu jednotku. „Hdyž knihu čitam, njemóžu hižo přestać“, měni 13lětny Jonas Kampa z Łaza. Zahoriće powěda wón wo knižnym rjedźe „Tři prašaki“ ze Stuttgartskeho Kosmos-nakładnistwa. Lědma je noweho wudaća, kotrež by wón zapasł. „Tam wudawaja stajnje dwě wersiji, jednu za dźěći, dalšu za młodostnych. Sam čitam stajnje wobě“, powěda šuler rjadownje 8A Wojerowskeho Křesćanskeho gymnazija Johanneum. Lětsa je so Jonas na „knižnym lěću Sakskeje“ wobdźělił. Projekt krajneho zwjazka w Němskim zjednoćenstwje bibliotekow, kotryž spěchuje zwjazkowe ministerstwo za wědomosć a wuměłstwo, wusměrja so na jědnaće do 16lětnych čitarjow. Projekt ma motiwować a do čitanja pohonjeć.
Wosoł a kamel so stowaršatej
Wojerowska coologiska zahroda wosrjedź města skedźbnja wobstajnje na to, zo su tam zwěrjata wšelakich družin zhromadnje žiwe. To je tež tema wodźenjow za wšitke generacije, kotrež hladarka Silke Kühn přewjedźe.
Wojerecy (AK/SN). Kubaske zyby lětaja wokoło leguana Antonija po tropowym domje. Zas a zaso dypaja wone zornjatka a žeru insekty. Tak přinjesu wotměnu do wšědneho dnja Antonije. „Wone so jara derje znjesu“, měni hladarka Silke Kühn. Hižo 25 lět wona we Wojerowskim zwěrjencu skutkuje. Dwě lěće stara so mjeztym tež wo zwěrjeću šulu. Njedawno přeprosy wona na wodźenje pod hesłom „Zwěrjata coowa so stowaršeja“. „Stowaršenje je forma zaběry“, Silke Kühn rozjasnja a wopytowarjo kedźbliwje připosłuchaja. „Zo su družiny hromadźe žiwe, je wažne za coo. Zwěrjata maja sej runje kaž w dźiwiznje swój žiwjenski rum zdobywać. We wulkim akwariju płuwaja sumy, skalary, čorny čertowy płóšak a dalše ryby. Jenož někotre kročele dale łaža po klětce lisztowe a tamarinowe wopički kaž tež kejžorskowusate tamariny. Tež wone so derje znjesu. „To je kaž w zhromadnym bydlenju“, Silke Kühn praji.
Nowosć z ABCja
Choćebuz (SN). Dźěłanišćo za serbske kubłanske wuwiwanje (ABC) je wudało hru „Tšojniki“. Kartowa hra podpěruje předewšěm pomjatk a čitanje dźěći, zdźěli projektowa sobudźěłaćerka Choćebuskeho wědomostneho kubłanskeho zarjadnišća Antje Kellowa.
Mjeztym druhi dźěl kartoweje hry zaběra so ze zwěrjatami našeje domizny. Zwobraznjene su dźiwje zwěrjata, kotrež so mjez sobu honja. Na 16 słownych kartkach steja wšelake informacije wo zwěrjatach, znajmjeńša pak jich mjeno. Podate je wone w serbskej, němskej a łaćonskej rěči. Tamne 32 kartow pokazuje zwěrjo na foće – a to muske kaž tež žónske. Do hry zapřijaty je dale joker (wušk), wosebita wobrazowa karta. Jako rěčna pomoc je na dalšich kartach přidaty přehlad dwurěčnych wobrotow, kotrež hrajerjo trjebaja. Poskitk njesłuži pak jenož za jednu wariantu hry. Kartowa hra hodźi so tohorunja jako memory wužiwać. Zdobom namaka so we wjacorych hrajerskich wariantach najlěpši hrajer.
Mjeno „Tšojniki“ wuchadźa z toho, zo zaběraja so stajnje tři karty z jednym dźiwim zwěrjećom. Hra je myslena za šulerjow, kotřiž započinaja serbšćinu wuknyć.
„Programěrować je to, štož chcu“
W swětle zjawnosće stać njeje ničo za Adriana Ćěslu. Radšo sedźi wón při swojim kompjuteru a programěruje. „To je mi najlubša zaběra“, měni młody Zdźěrjan. Na čłonskej zhromadźiznje Serbskeho šulskeho towarstwa zańdźeny měsac w Chrósćicach pak staješe so wón prašenjam serbskich kubłarkow a kubłarjow. Adrian Ćěsla zestaja tuchwilu internetnetnu stronu „Dyrdomdej“, kotruž chce SŠT klětu za zjawne wužiwanje přewostajić. Prěnje poskitki strony je wón tam rozłožił a přitomnym wužiwanje cyle praktisce předstajił. Před poł lětom je započał stronu programěrować. Klětu w februaru ma wona z prěnimi temami online być.
Adrian Ćěsla je šuler 11. lětnika na Budyskim Schillerowym gymnaziju. Wón serbšćinu rozumi, jeno zo ju rěčnje dospołnje njewobknježi. Přiwšěm je jemu serbske žiwjenje bliske. Zestajenje mjenowaneje strony njeje prěni projekt, kotryž za digitalny swět koncipuje. Do toho je wón hižo aplikaciju „Serbsce lochko“ za mobilne telefony programěrował.
Próstwu wo twar nětko wotedali
Njebjelčanska gmejna chce klětu wjele pjenjez za nowe hortowe rumnosće nałožić. Dale gmejna planuje, wutworić šulske kubłanišćo w swobodnym nošerstwje.
Njebjelčicy (SN/MiR). Před něšto dnjemi je Njebjelčanska gmejna zapodała próstwu, twarić nowy hort w gmejnje. Tón ma nastać nad rumnosćemi sportoweho towarstwa, w tuchwilnej galeriji a gmejnskej bibliotece. Njebjelčanski wjesnjanosta Tomaš Čornak (CDU) so nadźija, zo zarjad spěšnje na dobro šulerjow rozsudźi. „Chcemy nalěto twarić započeć. Z nowym šulskim lětom potom měli hortowi šulerjo w tychle rumnosćach po wučbje přebywać“, wón praji.
Njedosahacy poskitk zwěsćili
Hłowni šulerjo maja dale a wjetše ćeže, wukubłanske městno namakać
Budyšin (dpa/SN/at). Wukrajni młodostni a hłowni šulerjo maja w Němskej jenož mało wuhladow na wukubłanske městno. Kaž we wčera wozjewjenym „Krajnym monitorje powołanske kubłanje 2017“ Bertelsmannoweje załožby pisaja, njedocpěwa po wšěm Zwjazku dobra połojca „wšěch młodostnych bjez němskeho pasa“ wukubłanske městno w dualnym systemje abo šulerskim powołanskim systemje. Młodostni z hłownošulskim wotzamknjenjom abo scyła bjez šulskeho wotzamknjenja maja so nimale runje tak ćežko.
Šulerjo dźěćatko zeznali
Swoje dohodowne wjeselo zamóža holcy a hólcy rjadownje 4a Wojerowskeje zakładneje šule „Handrij Zejler“ z tójšto serbskimi basnjemi a pěsnjemi zwuraznić. Tole pokazachu šulerki a šulerjo tele dny we Wojerowskim župnym domje Domowiny.
Wojerecy (UH/SN). Hromadźe ze swojej rjadowniskej wučerku Reginu Kumerowej dožiwi rjadownja 4a Wojerowskeje zakładneje šule „Handrij Zejler“ w tymle tydźenju wosebity šulski dźeń. Jich bě regionalna rěčnica Domowiny Christina Šołćina na serbske dohodowne zetkanje přeprosyła. Sami abo w skupinkach přednjesechu šulerjo w župnym domje swoje serbske basnje a najwšelakoriše pěsnje. Mjeztym powědaše Christina Šołćina wo serbskich wašnjach a nałožkach w adwentnym a hodownym času. Někotre informaciske taflički jeje wuwjedźenja hišće bóle znazornjachu. Tež wo Wojerowskim dźěćatku regionalna rěčnica rozprawješe.
