Wosypicy wutupić

štwórtk, 27. februara 2020 spisane wot:

Nowy zakoń wo šćěpjenju wot 1. měrca po cyłej Němskej płaći

Budyšin/Miłoćicy (CS/SN/MiR). Wot póndźele, 1. měrca, płaći w Němskej nowy zakoń wo škiće přećiwo wosypicam. Strowotniski zarjad Budyskeho wokrjesa informowaše tuž wčera wo stawje přihotow. Zasadnje je tak, zo wobsteji po přepytowanjach w šulskim lěće 2018/2019 mjez dźěćimi a młodostnymi dobra kwota šćěpjenja. Z přepytowanych dźěći w starobje štyrjoch, šěsć a dwanaće lět zwěsćichu kwotu šćěpjenja 95 procentow a wjac.

Wotewru šulski centrum

srjeda, 26. februara 2020 spisane wot:

Wjace hač 25 milionow za kubłanišćo w Slepom nałožili

Dołho planowany projekt je nětko zakónčeny. Wot póndźele wuwučuja w Slepom w nowym němsko-serbskim šulskim kompleksu na kromje wsy. Gmejna Slepo je zhromadnje ze Sakskej, přede­wzaćom Vattenfall Europe Mining­ AG a jeho naslědnicu LEAG něhdźe 25,5 milionow za twar projekta nałožiła. Zajutřišim, pjatk, přeproša wyša šula na interne zahajenje skutkowanja noweho šulskeho stejnišća. W tym zwisku chce nawoda wyšeje šule Wolfgang Goldstein staflowy stab nawodnistwa swojemu naslědnikej přepodać. Wšako poda so na wuměnk. Wot 1. měrca nawjeduje šulu Jan Hrjehor, kiž bě tam dotal wučer za serbšćinu a sport. W běhu zašłeju lět je Wolfgang Goldstein Janej Hrjehorjej zakłady nawjedowanja šule posrědkował.

Termin oficialneho přepodaća dotal jasny njeje. Tón chce gmejna ze statnej kencliju wothłosować. Wšako chcedźa tam tež sakskeho ministerskeho prezidenta Michaela Kretschmera (CDU) witać, dokelž bě wažny podpěraćel pro­jekta.

Nowotwar dokónčeny

srjeda, 26. februara 2020 spisane wot:

Wuměnjenja za dźěći a kubłarjow w přebywanišću nětko wuběrne

Tójšto lět su sej dorosćeni a chowancy Kulowskeho Katolskeho dźěćaceho domu „Jakubetzstift“ – nošer je Kulowska wosada – nowe rumnosće přeli. Wot srjedź februara je narunanski twar po połdralětnej twarskej fazy hotowy. Nětko móža kubłarki a dźěći z dotalneho přebywanišća na Budyskej dróze na Augusta Bebelowu přećahnyć. Wot 2. měrca móža w nowym domicilu přebywać, a to w domje z mjenom swj. Marije. 19. apryla su wšitcy zajimcy na swjedźeń a dźeń wotewrjenych duri přeprošeni, hdźež móža so wo wuběrnych wuměnjenjach přeswědčić. Te sahaja wot tepjenja w špundowanju přez swětły atrium, kiž hodźi so tež za zarjadowanja wužiwać, hač k terasam za zhromadnu snědań. Hižo loni nazymu, na přechodźowanju po twarnišću, su wopytowarjo wosebitosć nowotwara začuwali. 45 žłobi­kowych dźěći změje štyri skupinske a wotpowědnu ličbu rumnosćow za wšědny spar. Sto městnow je za pěstowarske dźěći w šěsć rumnosćach předwidźanych. Dale maja w přizemju rumnosć za wotstajenje sezonalnje trěbnych wěcow kaž hrajkow.

Inwestuja do digitalizacije šulow

štwórtk, 20. februara 2020 spisane wot:

Digitalny wutwar sakskich šulow budźe wosebje přichodne šulske lěto přiběrać. Tuchwilu předleži sakskemu kultusowemu ministerstwu wjace hač 30 próstwow šulskich nošerjow we wobjimje wjace hač 20 milionow eurow.

Wojerecy (SN/MiR). Město Wojerecy je ja­ko šulski nošer 1,5 milionow eurow ze spěchowanskich srědkow Zwjazka za di­gitalne wuhotowanje šulow nje­daw­no dóstało. Přepodał bě je statny sekretar sakskeho kultusoweho ministerstwa Herbert Wolff. Wojerowski wyši měšćanosta Stefan Skora (CDU) přija šek, kotryž bu na dobro wosom Wojerowskich šulow wupisany.

W cyłku je dotal něhdźe połsta sakskich šulskich kubłanišćow wo spěchowanske srědki prosyło. Sakska ma hač do lěta 2024 za naprawu 250 milionow eurow předwidźanych. Z tych pjenjez přińdźe 225 milionow eurow wot Zwjazka, 25 milionow eurow po połojcy wot Sakskeje a nošerjow šulow.

Z wobsahami pjelnić

štwórtk, 20. februara 2020 spisane wot:
Sakska ma nowe kredo: „Technika sćěhuje pedagogiku.“ Tak znajmjeńša zwurazni to sakski statny sekretar za kultus Herbert Wolff, kiž přepoda njedawno městu Wojerecam jako šulskemu nošerjej šek w hódnoće 1,5 milionow eurow. Wón nima přiwjazanje na WLAN abo tablet za srědk, zo so šuler awtomatisce mudriši stanje abo zo so tak wučba polěpši. Ministerstwo je wjace hač sto fachowych planow za sylnjenje kubłanja na polu medijow zdźěłało. W nich su wobsahowe temy digitalneho kubłanja narěčane. Zdobom wučerjow intensiwnje dale kubłaja. Hdyž tomu tak je, potom so dźiwam, zo njeje we Wojerecach dotal jasne, za čo maja so spěchowanske srědki na šulach we wobsahowym dźěle zasadźić. Ja wšak bych ideje měła: Kak wěstosć šulerjow při dźěle w interneće zaručić? abo: Kak jich zahorić, pro­gramy w serbskej rěči wuwiwać? Wuhotować šule z techniku je jenož jedna stronka medalje. Milenka Rječcyna

Nowy nawoda

srjeda, 19. februara 2020 spisane wot:

Slepo (SN/MiR). Jan Hrjehor budźe nowy nawoda Wyšeje šule „Dr. Marja Gról­musec“ w Slepom. Wčera po připołdnju je wón w regionalnej wotnožce Krajneho zarjada za šulu a kubłanje Budyšin dźě­łowe zrěčenje podpisał. Wot 1. měrca budźe­ w nowym zastojnstwje skutkować. Dotal bě na Slepjanskej wyšej šuli fachowy wučer za sport a serbšćinu. Mjeztym skutkuje tam třeće šulske lěto.

Wot 24. februara, wot spočatka dru­heho šulskeho połlěta 2019/2020, tuchwilny nawoda kubłanišća Wolfgang Goldstein Jana Hrjehorja jako noweho šulskeho nawodu přez cyły tydźeń zadźěła. Nětko w prózdninskim času staj přepo­daće hižo přihotowałoj. Wosebitosć nimo toho je, zo zaćahnu šulerjo přichodnu póndźelu zhromadnje z Janom Hrjehorjom jako nowym nawodu do noweho Němsko-Serbskeho šulskeho kompleksa „Dr. Marja Grólmusec“.

W prózdninach do horta

wutora, 18. februara 2020 spisane wot:

Horty w serbskich a serbšćinu posrědkowacych dźěćacych dnjowych přebywanišćach su w zymskich prózdninach woblubowany cil šulskich dźěći. Wšako poskićeja tam kubłarki a kubłarjo jara wotměnjawy program.

Chrósćicy/Ralbicy (SN/MiR). W Chrósćicach na přikład su dźěći hromadźe wa­rili a sej filmowu komediju wobhladali. Dalši dźeń pućowachu po wsy, doniž njejsu na piknik pola kubłarki załožili. W Budyšinje dožiwichu wone w dźěćacej knihowni putace čitanje.

Dźěćom a młodostnym poboku

pjatk, 14. februara 2020 spisane wot:

Biskopičanska dźěćaca a młodźinska syć je powšitkownowužitny a nadregionalnje připóznaty swobodny nošer młodźinskeje pomocy. K partneram słušeja tež serbske cyłki kaž Pawk.

Biskopicy (SN/mwe). Na konferencu wo najwažnišich předewzaćach a zarjado­wanjach we wobłuku dobrowólnych socialnych słužbow, šulskeho socialneho dźěła, partnerstwow za demokratiju, mobilneho škita młodźiny a dyrdomdejskeho campa bě teamowy šef Biskopičanskeje dźěćaceje a młodźinskeje syće „KiJu-Netzwerk“ Andreas Mikus wčera nowinarjow přeprosył. K hižo wjelelětnym spušćomnym partneram słušeja tež serbske cyłki kaž młodźinske towarstwo Pawk, šule a zarjadnistwa w dwurěčnej kónčinje kaž tež młodźinske kluby, mjez druhim w Pančicach-Kukowje.

Wšako su mjez něhdźe 100 dobro­wólnu słužbu wukonjacymi tež serbscy młodostni a wosebje woblubowany je pola dźěći z Ralbic a wokoliny kóždo­lět­ny dyrdomdejski camp při Němskopazličanskim wulkohaće. „To je městnosć za wjele aktiwitow, wotměny, kreatiwity – ale tež za wočerstwjenje, prawy dyrdomdej a wjeselo“, w flajeru mjez druhim rěka.

Wuměłstwo w lutowarni widźeć

štwórtk, 13. februara 2020 spisane wot:
Tuchwilu su widźeć w Kulowskej nalutowarni wuměłske twórby wosebiteho razu. Je to mjeztym hižo štwórta wustajeńca kursa za wuměłstwo Ewangelskeje wyšeje šule Wóslink, kotruž šulerjo w pjenježnym instituće pokazaja. Za lětušu přehladku su woni naćisnyli a twarili stólcy a su je na temu, kotruž su sej sami wuzwolili, wuhotowali. Foto: Daniela Jawinski

Mali wuměłcy tworja za wulki projekt

štwórtk, 13. februara 2020 spisane wot:

Stróža (SN/MiR). W Stróži nastawa tuchwilu nowa kubłanska a přirodowa šćežka. Jeje wosebitosć budu wšela­ko­re interaktiwne elementy a wunoški z mnohich dźěłarničkow, kotrež so w bio­sferowym rezerwaće Hornjołužiska hola a haty, kaž w tymle tydźenju, wotměwaja. W Domje tysac hatow maja wosom­ młodych wuměłcow mjez šěsć a dwanaće lětami z wokolnych wsow, z Drježdźan a Zhorjelca dobre wuměnjenja. Ida Harrecker z Drježdźan zhotowja skicu k swojemu powědančku z titlom „To, štož kóždy njewidźi“. Konrad Hacker z Bukojny (Buch­walde) pak dźěła na wuměłskej twórbje za swoje powědančko „Karp Blub“. Skicy so na linolej přenjesu a tak nastawa linolorězba.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND