Stajnje njekomplikowana a njesebična była
Worklecy (jb/SN). Na Serbskej zakładnej šuli „Michał Hórnik“ we Worklecach rozžohnowachu njedawno wjelelětnu wučerku Gabrielu Roblowu na wuměnk. Po studiju na Budyskim Serbskim wučerskim instituće wuwučowaše Serbskopazličanka najprjedy w Kamjencu, doniž njenastupi wučerske městno 1983 we Worklecach. Tam bě hač donětka zasadźena, byrnjež jendźelšćiny dla – předmjet, kotryž je sej přidatnje přiswojiła – stajnje zaso w druhich šulach wupomhać dyrbjała. Tak bě mjez druhim do Ralbic, Budyšina, Chrósćic a Pančic-Kukowa „delegowana“, zo by tamnišim šulerkam a šulerjam swětowu rěč spřistupniła.
Bydyski serbski hort je pódla była wo durje Wanje kłapał
Swoju knihu spisać a ju na kóncu hišće w rukomaj dźeržeć – to je so dźěćom poradźiło, kotrež chodźa do horta Serbskeje zakładneje šule Budyšin w nošerstwje wokrjesa. Zhromadnje z kubłarjom Pětrom Sćapanom su cyły tydźeń na njej dźěłali.
Budyšin (SN/MiR). Na kóncu njeje zhromadna kniha wšitkich wobdźělnikow nastała. Ně, kóždy z nich dźeržeše swójski wudźěłk w rukomaj. Zmóžnił bě to projekt Budyskeje měšćanskeje biblioteki. Zhromadnje ze Sebastianom Hänelom (Buchkinder Görlitz) su šulerjo na drohoćince dźěłali. „Naš hort stajnje w prózdninach z měšćanskej biblioteku hromadźe dźěła“, kubłar horta na Serbskej zakładnej šuli Budyšin Pětr Sćapan rozprawja, „lětsa pak njeběchmy na městnje, ale wobdźělichmy so na zarjadowanju online, štož bě za nas absolutna nowosć.“ Přeprosyła bě jich sobudźěłaćerka biblioteki Kristin Lehmann.
Za syć młodźinskich klubow
Mjeztym šěsć tydźenjow Virginia Hanuzowa w zarjedźe Domowiny dźěła. Jako kubłanska referentka za młodźinu ma wona wulce wabjacy nadawk. Z Miłoćic pochadźaca 33lětna mać dweju dźěsći je w přewažnje němskej swójbje wotrostła, rěči pak serbsce. Wuchodźiwši Worklečansku zakładnu šulu „Michał Hórnik“, a po tym zo je něšto lět na Serbskim gymnaziju Budyšin wuknyła, maturowaše wona na Kamjenskim Lessingowym gymnaziju. Pobywši aupair na kupomaj Korsika a Madagaskar, je w durinskim Nordhausenje socialne dźěło studowała. „Dlěši čas sym z Wěteńcy, hdźež ze swójbu bydlu, do zapada na dźěło jězdźiła. Z mandźelskim smój sej to zarjadowałoj“, wona powěda. „Jako pak so Marko Kowar loni prašeše, hač nochcyła so za městno požadać, njejsym dołho rozmyslowała. Poskitk bě po mojim słodźe. Wšako chcych po dlěšim času z małymi dźěćimi zaso z młodźinu dźěłać.“
Spěchowanje na dobro rěče
Turjej (NC/SN). Dźěćace dnjowe přebywanišćo „Wroblikowe hnězdo“ w Turjeju (Tauer) w Picnjanskim hamće je sedme zarjadnišćo swojeho razu we wokrjesu Sprjewja-Nysa, kotrež ma lěpšinu ze spěchowanskeho programa kraja Braniborskeje, kaž Nowy Casnik rozprawja. Z programom podpěruja wot lěta 2019 pěstowarnje při posrědkowanju delnjoserbskeje rěče. Zarjadnišću su tydźenja wobkrućenje wo spěchowanskich srědkow 12 680 eurow přepodali.
Serbske tradicije maja we „Wroblikowym hnězdźe“ krute městno. Nětko budu tam tež rěč spěchować. Kubłarki su sej předewzali, přichodnje dwě skupinje dwurěčnje dohladować. Wšitkim tamnym dźěćom chcedźa z poskitkami zetkawanskeje rěče na hrajkace wašnje přistup k serbšćinje zmóžnjeć. Tak měli sej dźěći witanja a rozžohnowanja, hrónčka za blidom a wšědne wobroty přiswojić. Za to pak trjebaja w pěstowarni hišće kubłarki, kotrež delnjoserbšćinu wobknježa.
Materialije nětko online poskićeja
Choćebuz (ChP/SN). Platforma Dźěłanišća za serbske kubłanske wuwiwanje Choćebuz „ABC Sorbisch/Wendisch“ za wuwučowacych je wot kónca januara online. Informaciju dóstali su šule, w kotrychž dźěći a młodostni serbšćinu wuknu, tydźeń do zymskich prózdnin. W cyłku je tři lěta trało, zo bychu format, financowanje, juristiske zapołoženje, struktura, wužiwanje a administracija zrjadowane byli. Ministerstwo za kubłanje, młodźinu a sport Braniborskeje kaž tež Statny šulski zarjad Choćebuz stej na projekće wobdźělenej byłoj.
„Mać“ serbskeho internata dźe na wuměnk
Z přinoškom w Serbskich Nowinach chcemy dźensa našu „internatnu mać“ knjeni Weroniku Bulankowu „wobjimać“, dokelž so wona runje dźensa na zasłuženy wuměnk poda. Rady bychmy so wšitcy tak prawje k njej přitulili. Pandemija pak šulerkam, šulerjam, wučerkam, wučerjam, staršim kaž tež kolegam njedowola knjeni Bulankowu rozžohnować a jej dźak wuprajić, kotryž by sej zasłužiła. Lózyska to korona!
Puć k wučerstwu serbšćiny tež we Wojerecach funguje
Wojerecy (KD/SN). Wot lěta 1921 maja we Wojerecach Lessingowy gymnazij, kotryž bě tehdy prěnja dale wjeduca šula w měsće. Wučbu serbšćiny pak podawaja tam hakle wot lěta 1992, jako bu kubłanišćo po swojim času jako rozšěrjena wyša šula znowa załožene, wě so tehdyši šulski rada wokrjesa Wojerecy Werner Böhme dopomnić. Tak započachu po nowym puću kročić, zo njetrjebaja wuknjacy 5. lětnika ze srjedźneje Łužicy hižo na Budyski Serbski gymnazij hić a tam w internaće bydlić, zo bychu serbšćinu wuknyli abo so w swojej maćeršćinje wukmanili.
Dźensa ma wučerka serbšćiny Lubina Kühnowa na Wojerowskim Lessingowym gymnaziju kóžde lěto šulerki a šulerjow w 5. a 6. lětniku, kotřiž chcedźa rěč wuknyć. Někotři su maćernorěčni, dalši maja znajomosće z wučby serbšćiny na zakładnej šuli „Handrij Zejler“ a dalši gymnaziasća so prosće za serbšćinu zajimuja, Lubina Kühnowa rozłožuje. Štóž chce so wot 7. do 12. lětnika dale na wučbje serbšćiny wobdźěleć, móže to na cyłodnjowskim poskitku serbšćina, kotryž so samo dopołdnja wotměwa.
Stabilna syć je zakład!
„Serbska šula“ snadź bórze tež digitalna
Rěčny centrum WITAJ wobsteji mjeztym 20 lět. To je přičina, zaběrać so w rjedźe přinoškow z dźěławosću serbskeje institucije, kotraž je Domowinje přirjadowana. Milenka Rječcyna je so ze zamołwitej redaktorku časopisa Serbska šula (SŠ) Bianku Wjeńcynej z RCW rozmołwjała.
Su w lětach skutkowanja jeničkeho serbskorěčneho pedagogiskeho magacina łamki byli, a su hinaše wobsahi porno časej załoženja k tomu přišli?
Z roboterami wuknyć
Kak robotery jako wučbny srědk wužiwać – to rozjimaštaj Michał Cyž ze Sakskeho wukubłanskeho a wuwiwanskeho kanala (SAEK) a informatikar Wito Bejmak we wobłuku zhromadnje z Techniskej uniwersitu Drježdźany wuhotowaneho webinara. Nimo toho namjetowaštaj wutworić skład, spřistupnjacy šulam wotpowědnu techniku.
Budyšin (SN/bn). „Kawsalnje myslić móc je bytostna tema přichoda“, Wito Bejmak wčerawše zarjadowanje zahaji. Tónle kognitiwny proces hodźał so z pomocu roboterow spěchować, kaž informatikar na přikładźe modela „B-Bot“ pokaza. „Šulerjo móža jón sami programěrować, tak zo je kmany nadawki spjelnić, kotrychž kompleksita je naposledk njewobmjezowana. Tak wuknjacym na zabawne wašnje zmóžnjamy so z techniku rozestajeć. Zdobom polěkujemy logiskemu myslenju, koordinaciji a orientaciji.“
