Hospodarski plan z tójšto mjeńšimi předewzaćemi a jednym wjetšim
Worklecy (SN/MWj). Předpisane wotpisanja po knihiwjedniskim systemje dopik su na tym wina, zo Worklečanska gmejna lětsa wurunany hospodarski plan nima. Etat předwidźi 1,7 milionow eurow dochodow a 1,9 milionow eurow wudawkow. Z toho je 230 000 eurow wotpisanjow. „Bjez nich by plan wurunany był“, rozłoži wjesnjanosta Franc Brusk (CDU). W tuchwilu płaćiwym přechodnym času móžeše gmejnska rada plan přiwšěm schwalić. Snadne zadołženje jenož wo něšto wjace hač sto eurow na wobydlerja wotbłyšćuje, zo gmejna solidnje hospodari.
Na lisćinje inwesticijow steja wjacore mjeńše předewzaća, ale tež jedne wjetše. Lětsa mjenujcy započnu přetwar Worklečanskeje sportownje přihotować. Za planowanske dźěła je dohromady 82 000 eurow předwidźanych, z toho chcedźa lětsa 50 000 eurow wudać. Saněrowanje hale we wobjimje něšto wjace hač miliona eurow ma klětu slědować.