Budyšin (CS/SN). Posledni kónc tydźenja meje wotměje so zaso Budyske nalěćo. Wot 29. hač do 31. meje změja na mnohich jewišćach hudźbu a za słódne jazyki kulinariske wosebitosće. Dohromady 60 wikowarjow a gastronomow wočakuje swojich hosći.
Serbska piwowa zahroda budźe zaso pod Bohatej wěžu. Mjez hudźbnymi a dalšimi skupinami su dwaceći, kotrež hišće ženje w Budyšinje wustupili njejsu. Derje znata je porno tomu Smjerdźečanska rejwanska skupina, kotraž hromadźe ze skupinu Sprjewjan swój nowy program z wěncom serbskich ludowych rejow předstaji.
Po tym zo je lońša premjera z elektroniskej hudźbu wulki wothłós žnjała, budu so wjacori DJjojo na Butrowych wikach wo načasnu hudźbu starać. To pak woznamjenja, zo změja tam pjatk a sobotu přidatne wobchadne poćežowanja. Wobydlerjo budu swoje awto w tym času na Třělnišću parkować dyrbjeć.