Wjesny dźěl Njebjelčanskeje gmejny Pěskecy ze swojimi lědma 230 wobydlerjemi bě swjatki mnohim přiwabliwy, a to nic jenož, dokelž wotmě so tam wčera 35. raz tradicionalny koparski turněr wjesnych mustwow.
Pěskecy (aha/SN). Nimale 80 sobustawow wopřijace sportowe towarstwo – najmłódši z nich je hakle pjatnaće, najstarši 70 lět – ze swojim agilnym předsydu Křesćanom Mjechelu je wjacore nowosće do swjedźenja zapřijało. Na wšěch dnjach sy čłonow towarstwa wuhladał w jich oranžowych trikotach z lipowym łopješkom a serbskim napisom Sportowe towarstwo Pěskecy.
Wažne hibićiwemu cyłkej je, zo maja w swojich rjadach tež čłonow wohnjoweje wobory z jich nawodu Křesćanom Matku a zastupjerjow młodźinskeho kluba, kotryž nawjeduje Patrik Šołta. Po tym zo běchu zašły tydźeń swjedźenišćo přihotowali a swjedźenski stan nastajili, hdźež hosći z „Witajće k nam“ strowjachu, bě sobotu wječor zazběh z koncertom skupin SerBeat a JANKAHANKA. Na to so młodostnym nóc z Berlinskimaj DJjomaj spěšnje miny.