Drastowe towarstwo z wopytowarjemi 20. raz na pólnej mjezy swačiło
Židźino (UH/SN). Kak žiwe su serbske nałožki a wašnja w Židźinom, móžeš tam kóžde lěto prěni junijski kónc tydźenja dožiwić, hdyž čłonojo serbskeje drastoweje skupiny swačinu na pólnej mjezy jako swój towarstwowy swjedźeń wuhotuja a stajnje tež zajimcow z wokolnych wsow přiwabjeja. Lětuša wosebitosć minjenu sobotu a njedźelu bě, zo wobstejitej towarstwo a jeho swjedźeń 20 lět. Na swjedźenske zarjadowanje su sej tuž tych přeprosyli, kotřiž běchu jich we wšěch lětach podpěrali.