Hudźbny projekt Kamjentneho domu bjez serbskich wobdźělnikow
Budyšin (SN/mwe). Kamjentny dom w Budyšinje přewjedźe wot 12. do 26. julija profesionalnu mjezynarodnu dźěłarničku „M(US)IKROSKOP“. Tematisce podadźa so wobdźělnicy z Němskeje a Pólskeje wot sakskeje kulturneje załožby spěchowaneho projekta zhromadnje na hudźbno-kulturne pytanje folklornych tradicijow. Při tym chcedźa za zhromadnosćemi slědźić a je z modernymi stilowymi srědkami kaž tež ze swójskimi aranžementami kombinować.
Lisćina přizjewjenych wobdźělnikow z Němskeje a Pólskeje předleži. Bohužel pak njeje mjez nimi ani jenički serbski hudźbnik abo spěwar. Runje na młodych Serbow su organizatorojo wokshopow z wuběrnymi docentami hudźbnych wysokich šulow, kaž z Malte Rogackim, sadźili a za spěwnu dźěłarničku serbskeho wuměłca Istvána Kobjelu wuzwolili. Wšako je naša ludowa hudźba jara bohata. Serbscy hudźbnicy bychu z přirodnymi instrumentami k poradźenju zarjadowanja směrodajnje přinošować a tak druhim bohate a dźensa dale žiwe kulturne tradicije sposrědkować móhli.
