Cyle poněčim, ale wobstajnje so wotbłyšćuje, zo je po wšej Němskej cyła powołanska skupina eksistencielnje wohrožena. Dźeń a wjace babow čuje so nuzowane, swoje powołanje złožić.
Wojerecy (UH/SN). Poslednja swobodnje skutkowaca baba we Wojerecach, kotraž so wo młode maćerje při porodźe zwonka chorownjow stara, je lětsa spočatk apryla tónle dźěl swojeho dźěła spušćiła, a to po 34 lětach praktiskeho skutkowanja w tym wobłuku. Přičina bě pjenježneho razu. Přinoški za powołanske zawěsćenje su minjene lěta wobstajnje přiběrali a wučinjachu spočatk julija 2015 wjace hač 6 000 eurow wob lěto. Tójšto babow poskića swoje posłužby tuž „jenož“ hišće do a po porodźe.