Wjesny a młodźinski klub z wohnjowej woboru swjedźeń wuhotowali
Koćina (aha/SN). Něhdźe 400 zahorjenych přihladowarjow zbliska a zdaloka je wčera na Koćinskim wjesnym swjedźenju „Kotoł pisaneho“ dožiwiło. Volkmar Korch kaž tež šulerce Viktorija Langec a Luiza Kralec su wosom programowych dypkow z něhdźe 30 sobuskutkowacymi Koćinjanami wšěch starobnych skupin serbsce a němsce připowědźeli. Fabula dwuhodźinskeho předstajenja bě, zo měješe Američan Mac Donald wotpohlad, městu Zhorjelcej milion eurow přepodać. W tamnišej radnicy pak to wotpokazachu, dokelž maja hižo tajneho dobroćela. Tak so Američan rozsudźi, přewostajić pjenjezy serbskej wsy. Rozwažujo wo Chrósćicach, Němcach a Spalach wuzwoli wón skónčnje Koćinu. Tam předstajichu jemu wjesnych rjemjeslnikow a kak hižo předšulske dźěći na dwurěčnosć dźiwaja. Do programa zapřijeć chcychu tež Lózych hólcow, kotřiž pak nažel wotprajichu. Tuž za nich Hana a Beno (Jenny Markec a Vanessa Kralec) zaskočištej a někotre spěwy kabaretneje skupiny live zanjeseštej.
