Halštrow (SN/mwe). 14. króć přewjedźe sobotu a wčera Halštrowska Hollandec hornčernja dworowy swjedźeń. „Ideja za to je z firmoweho jubileja wurostła. Chcemy ludźi pohonjeć, zo bychu so tež sami w hornčerjenju pospytali, štož hewak w normalnym dźěłowym procesu móžno njeje“, rozłoži šef małeho zawoda Hans Holland. Tule přiležnosć je tež tónkróć tójšto zajimcow wužiwało, wosebje dźěći a młodostni mějachu při tym swoje wjeselo. Pjatnaćelětna Pauline Löchel na přikład rjekny: „Je zajimawe widźeć, kak tajki hornčernski wudźěłk nastawa, Mnozy w mojej starobje sydaja doma radšo před kompjuterom a scyła njewědźa, što ručne dźěło woznamjenja.“