Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a někotre fary předstajamy – dźensa Rakečansku.
Na dwuposchodowym farskim domje za něhdyšej šulu a mjeztym Rakečanskej radnicu zapadnje cyrkwje napadnjetej lětoličbje nad wjelbowanym hłownym zachodom. Pěskowc róžkow a nad woknami kaž tež barbojtosć fasady wuzběhujetej barokny charakter loni wobšěrnje wobnowjeneho farskeho domu. Tamna lětoličba pokazuje na jeho twar 1603. W starych cyrkwinskich aktach lědma něšto wo tamnišej farje nańdźeš. Jeničce zapisk na dnju swjateje Marije Madleny 22. julija 1597 pokazuje na rozpadowacy farski dom. Połožili běchu tuž zakładny kamjeń za nowotwar na nětčišim městnje w lěće 1603. Prěni ewangelski farar po reformaciji bě tam 1565 Simon Garwin z Baršća. Tež dalši duchowni, kotřiž Lutherowe wučby posrědkowachu, pochadźachu z Delnjeje Łužicy. Hakle 1650 so to změni, a nimale wšitcy fararjo wot toho časa běchu Serbja abo su serbšćinu nawuknyli.
