Štož maja w delanskich wsach hižo něhdźe połdra lětdźesatka a mjeztym tež něšto lět we Wotrowje, započina nětko tež w Lejnje dźěłać: wjesna rada. Zawčerawšim su ju w Kubicec hosćencu wutworili. Třo přitomni čłonojo wuzwolichu Stefana Handrika za wjesneho předstejićerja (SN wčera rozprawjachu). 43lětny je po powołanju zamkar, skutkuje pak samostatnje w twaršćiznowym wikowanišću swojeho nana, kotrež poněčim přewozmje. Tójšto firmow a priwatnych wosobow so tam z twaršćiznami zastaruje abo wužiwa Handrikec hłubokotwarske a dalše posłužby.