Na lětanskich dnjach horcoty dla wšitko pokazać njemóhli
Lětoń (CS/SN). Na 12. Budyskich lětanskich dnjach mějachu horcoty dla někotre ćeže. Tak je pjatk a sobotu mjenje wopytowarjow hač zwučene na tele nadregionalne zarjadowanje přišło. Najebać tropiske temperatury běchu wšitcy přizjewjeni piloća přijěli, bohužel pak njemóžachu wšitke planowane pokazki startować. Přičina bě, zo je so w mašinach tajkich wysokich temperaturow dla wolij přejara woćoplił. Najbóle wabili su hosći lětanskeho eventa hoberske helikoptery Sikorsky A 58, z kotrymiž móžachu zajimcy sobu lećeć. Wjeršk pak běchu pokazki wuměłskich lětow mustwa The flying bulls z Čěskeje. Njeposrědnje po spektakularnym lěće je pilot Stanislav Čejka zahorjenym přihladowarjam samo awtogramowe fota wudźělał.